რუსეთის პრემიერმინისტრმა მიხეილ მიშუსტინმა და ჩრდილოეთ კორეის მინისტრთა კაბინეტის თავმჯდომარემ პაკ თე-სონმა ვიდეოკონფერენციის საშუალებით ორ ქვეყანას შორის საზღვარზე, მდინარე ტუმანნაიაზე, საავტომობილო ხიდი გახსნეს.

ხიდის მშენებლობის დასრულების ცერემონია 7 სექტემბერს გაიმართა. ხიდს წითელი არმიის ოფიცრისა და ჩრდილოეთ კორეის შრომის გმირის, იაკობ ნოვიჩენკოს, სახელი ეწოდა.

პროექტის განხორციელების შესახებ შეთანხმებას 2024 წელს რუსეთის პრეზიდენტ ვლადიმირ პუტინისა და ჩრდილოეთ კორეის სახელმწიფო საქმეთა კომიტეტის თავმჯდომარე კიმ ჩენ ინის თანდასწრებით მოეწერა ხელი. 2025 წლის აპრილში მიშუსტინმა და პაკ თე-სონმა სამშენებლო სამუშაოების დაწყებას მისცეს სტარტი.

როგორც რუსული მედია წერს, მდინარე ტუმანნაიაზე "მეგობრობის ხიდზე" სარკინიგზო მიმოსვლა მოქმედებს, თუმცა ის გადაზიდვებზე არსებული მოთხოვნის დასაკმაყოფილებლად საკმარისი აღარ იყო. ახალი საავტომობილო ხიდით მოძრაობა მთელი წლის განმავლობაში იქნება შესაძლებელი.

ორზოლიანი ხიდის სიგრძე დაახლოებით 1 კილომეტრია. მათვე ცნობით, პარალელურად აშენდა"ხასანის" საავტომობილო საზღვრის გამშვები პუნქტი, რომლის პროექტი 10 სამოძრაო ზოლს ითვალისწინებს. რუსეთის მთავრობის პრესსამსახურის ცნობით, გამშვები პუნქტის სრული დატვირთვით ამოქმედების შემდეგ მისი გავლა დღეში 300-მდე სატრანსპორტო საშუალებას და 2,3 ათასზე მეტ ადამიანს შეეძლება, საჭიროების შემთხვევაში კი ეს მაჩვენებლები გაიზრდება.