თბილისში გარდაცვლილ აფხაზ ბლოგერ დაურ ბუავას დღეს დაკრძალავენ. ამის შესახებ სოციალრ ქსელში საჯარო ბიბლიოთეკის დირექტორი კონსტანტინე გამსახურდია წერს და სარიტუალო სახლში გადაღებულ ფოტოს აზიარებს.

"პანაშვიდი და დაკრძალვა 2 სექტემბერს, 12:00-14:00 საათზე — ბელიაშვილის 29, სარიტუალო სახლი "ნომორა". გვახსოვდეს, რომ გვიყურებს უფალი, გვიყურებს საქართველო ენგურს აქეთა ნაპირიდან და ენგურს იქითა ნაპირიდანაც", — წერს კონსტანტინე გამსახურდია.

დაურ ბუავას გარდაცვალების შესახებ ინფორმაცია 28 აგვისტოს გავრცელდა. პროკურატურის ცნობით, ის მეთადონის მიღების შედეგად გარდაიცვალა. საქმეზე 3 პირია დაკავებული, მათ შორის ერთ-ერთი — უკრაინის მოქალაქე ქალია, რომელსაც დაურ ბუავას განსაცდელში მიტოვებას ედავებიან.

დაურ ბუავა 2021 წლის შემოდგომიდან თბილისში ცხოვრობდა, 2022 წელს კი საქართველოს მოქალაქეობა მიიღო. სოციალურ ქსელებში გავრცელებულ ვიდეოებში მისი მთავარი გზავნილი ქართველებისა და აფხაზების შერიგება და მშვიდობიანი ურთიერთობა იყო. ის აფხაზეთის საქართველოს შემადგენლობაში დაბრუნებას ემხრობოდა, რადგან მიიჩნევდა, რომ "აფხაზისთვის ქართველზე ახლობელი არავინაა".