Manifest-ს — სერიალს თვითმფრინავზე, რომელიც საიდუმლოებით მოცულ ვითარებაში გაუჩინარდა და ხუთ-ნახევარი წლის შემდეგ ისე დაბრუნდა, რომ არცერთ მგზავრს ასაკი არ მომატებია — გაგრძელება ექნება.

ამ გაგრძელებაზე, სახელად Arrivals: A New Manifest Mystery, სერიალის თავდაპირველი გუნდი იმუშავებს. Arrivals-ს სათავეში ჩაუდგება Manifest-ის იდეის ავტორი ჯეფ რეიკი. მას შეუერთდებიან სერიალის აღმასრულებელი პროდიუსერები — მარგარეტ იზლი და ლორა პატნი.

ფოტო: NBC

Arrivals-ის აღწერა ასეთია: "როდესაც საიდუმლოებით მოცული თვითმფრინავი დენვერში ავარიულად დაეშვება, მგზავრებს არაფერი ახსოვთ — არც ის, ვინ არიან, საიდან მოფრინავდნენ ან რატომ იმყოფებიან იქ. ახალგაზრდა სოციალური მუშაკი და შიდა უსაფრთხოების სამსახურის აგენტი ჩამოფრენილებთან ერთიანდებიან, რათა კაცობრიობის განადგურება თავიდან აიცილონ. ამ პროცესში კი აღმოაჩენენ, რომ თავადაც იმ დიდი თავსატეხის ნაწილები არიან, რომლის ამოხსნასაც ცდილობენ".

Netflix-მა სერიალის შესახებ განცხადების გასაკეთებლად 28 აგვისტოს დილის 08:28 საათი სპეციალურად შეარჩია: Manifest-ის სიუჟეტი თვითმფრინავის რეის 828-ის გარშემო ვითარდებოდა და ამ ციფრებმა სერიალში განსაკუთრებული მნიშვნელობა შეიძინა.

ფოტო: Deadline

Manifest-ის პრემიერა NBC-ზე 2018 წლის სექტემბერში შედგა. სერიალში მთავარ როლებს მელისა როქსბურგი, ჯოშ დალასი, ათენა კარკანისი, ჯეი არ რამირესი, ლუნა ბლეიზი, ჯეკ მესინა, პარვინ კაური, მეტ ლონგი და ჰოლი ტეილორი ასრულებდნენ. NBC-მ შოუ 2021 წელს, 3 სეზონის შემდეგ გააუქმა, თუმცა მოგვიანებით Netflix-მა ის ბოლო, მე-4 სეზონისთვის განაახლა.

Netflix-ის მონაცემებით, 2023 წლის პირველი ნახევრიდან მოყოლებული, Manifest-ის ოთხივე სეზონს ჯამში 130 მილიონზე მეტი ნახვა აქვს დაგროვილი.