პრეზიდენტი დონალდ ტრამპი გეოგრაფიული სახელების გადარქმევის კამპანიას აგრძელებს. ამჯერად მას ამერიკის შტატ ნიუ-მექსიკოსთვის სახელის შეცვლა და "ახალი ამერიკის" დარქმევა სურს.

მისი ინიციატივა, რომელიც შტატის გუბერნატორმა დაუყოვნებლივ უარყო, მას შემდეგ გაჩნდა, რაც ტრამპმა კანადასთან სავაჭრო ომის ფონზე ხელი მოაწერა განკარგულებას ონტარიოს ტბისთვის სახელის შეცვლისა და მისთვის "ამერიკის ტბის" დარქმევის შესახებ.

ექსპერტების შეფასებით, ტრამპი ტბებისთვის, ყურეებისთვის, სრუტეებისა და ახლა უკვე შტატებისთვის სახელების გადარქმევის მსგავს პოპულისტურ ნაბიჯებს იყენებს, რათა ამერიკელების ყურადღება რეალური პრობლემებიდან, მათ შორის საწვავის ფასებისა და ცხოვრების ხარჯების სწრაფი ზრდიდან, გადაიტანოს.

"ბევრმა ადამიანმა შემომთავაზა, რომ ნიუ-მექსიკოსთვის, რომელიც ყველა დროის ერთ-ერთი ყველაზე გამორჩეული შტატია არჩევნების გაყალბების თვალსაზრისით, "ახალი ამერიკა" (NEW AMERICA) დაგვერქმია. ეს სახელი ბევრად უფრო პრესტიჟული და ლამაზი იქნებოდა ამ პოტენციურად შესანიშნავი შტატის მცხოვრებლებისთვის. ვაუ, ძალიან მომწონს ეს იდეა!!!", — დაწერა რესპუბლიკელმა პრეზიდენტმა საკუთარ სოციალურ ქსელ Truth Social-ში.

თეთრმა სახლმა საკუთარ ვებგვერდზე დონალდ ტრამპის Truth Social-ის ანგარიშიდან გამოაქვეყნა სურათი, რომელზეც შტატის სახელწოდებაში სიტყვა "მექსიკა" გადახაზულია და მის ნაცვლად "ამერიკაა" მითითებული.

დემოკრატმა გუბერნატორმა მიშელ ლუხან გრიშამმა Fox News-ს განუცხადა, რომ შტატის სახელწოდების საკითხი "განხილვას არ ექვემდებარება" და ის აშშ-ის შექმნამდე დიდი ხნით ადრე არსებობდა. მისი თქმით, პრეზიდენტი ტრამპი ცდილობს, ამერიკელების ყურადღება ისეთი პრობლემებიდან გადაიტანოს, როგორიც ბენზინის ფასების სწრაფი ზრდაა, — წერს AFP.

გასულ კვირას დონალდ ტრამპმა ასევე შესთავაზა ჰორმუზის სრუტისთვის "ტრამპის სრუტის" დარქმევა. ეს მსოფლიოს ერთ-ერთი სტრატეგიულად მნიშვნელოვანი საზღვაო გზაა.

2025 წლის იანვარში, მეორე საპრეზიდენტო ვადის დასაწყისში, ტრამპმა ცალმხრივად მექსიკის ყურეს "ამერიკის ყურე" უწოდა. გადაწყვეტილებას მექსიკის ხელისუფლებამ სადავო უწოდა.

კანადამაც უარყო ონტარიოს ტბისთვის სახელის შეცვლის ინიციატივა, რადგან ტბა აშშ-სა და კანადას ესაზღვრება.