აშშ-ს ელჩმა, კელი დეგნანმა ევროსაბჭოს მინისტერიალზე საუბრისას აღნიშნა, რომ ვერ წარმოუდგენია, როგორ უნდა მიეცა საქართველოს ხელისუფლებას უფლება ჩამოსულიყო ისეთი პირი, რომელსაც კანონები ჰქონდა დარღვეული. ამის შესახებ დიპლომატმა რადიო თავისუფლებასთან ინტერვიუს დროს ისაუბრა.

"რუსეთი არ აპირებდა მკაფიოდ ეთქვა, ვის გამოგზავნას აპირებდა დელეგაციის ხელმძღვანელად. ვერ წარმომიდგენია, როგორ უნდა მიეცა საქართველოს ხელისუფლებას საქართველოში შემოსვლის ნება პირისთვის, ვინც არაერთხელ დაარღვია კანონები და სრულად უგულებელყო ისინი აფხაზეთში ჩასვლით. ეს საქართველოს აყენებს პოზიციაში, როცა არ წარმომიდგენია, როგორ შეეძლოთ ამის დაშვება", — განაცხადა დეგნანმა.

ევროპის საბჭოს მინისტერიალი 14-15 მაისს უნდა გაიმართოს. საქართველოს, როგორც ევროპის საბჭოს მინისტრთა კომიტეტის თავმჯდომარე ქვეყანას, მინისტერიალისთვის თბილისში უნდა ემასპინძლა. თუმცა იმის გამო, ქვეყანაში შესაძლოა რუსეთის დელეგაციის ისეთი წევრები ჩამოსულიყვნენ, რომელთაც ოკუპირებული ტერიტორიების შესახებ კანონი აქვთ დარღვეული, მათ შორის შესაძლოა იყოს რუსეთის საგარეო საქმეთა მინისტრი სერგეი ლავროვიც, მინისტერიალის ჩატარების ადგილის შეცვლაზე მსჯელობა დაიწყო.

26 თებერვალს ცნობილი გახდა, რომ მინისტერიალი თბილისის ნაცვლად სტრასბურგში გაიმართებოდა. საგარეო საქმეთა მინისტრის, დავით ზალკალიანის თქმით, როგორც თავმჯდომარე ქვეყანას, საქართველოს უნდა უზრუნველყო ევროპის საბჭოს ყველა წევრი ქვეყნის მინისტერიალში მონაწილეობა და მათ შორის, რუსეთის მხარისაც.