პარლამენტში სიტყვით გამოსვლის დროს, პარლამენტში უმრავლესობის დეპუტატმა, მამუკა მდინარაძემ განაცხადა, რომ რამდენიმე დღეში საარჩევნო სისტემასთან დაკავშირებით საკონსტიტუციო პროექტს წარადგენენ.

მისივე თქმით, პროექტში გათვალისწინეული იქნება ე.წ. ჩამკეტი, ანუ არჩევნებში 40 პროცენტზე მიღების შემთხვევაში ვერც ერთი პარტია მთავრობას დამოუკიდებლად ვერ ჩამოაყალიბებს.

"თუ საუბარია მეტ პროპორციულობაზე, 2016 წელს რომ ჩატარებულიყო არჩევნები ჩვენ მიერ შეთავაზებული მოდელით, მივიღებდით ქართული ოცნება იგივე შედეგის მანდატების მიხედვით, რაც 5-პროცენტიანი ბარიერის არსებობის პირობებში პროპორციული არჩევნების დროს", — განაცხადა მდინარაძემ.

მისივე თქმით, თუ ოპოზიციას ბარიერის დაწევა სურს, ამის შეთავაზება მათ შეუძლიათ.

მას შემდეგ, რაც საარჩევნო სისტემაზე საუბარი განახლდა, ოპოზიციამ მოითხოვა, რომ უმრავლესობის ჩამოყალიბება ვერ შეძლოს ვერცერთმა პარტიამ, რომელიც ხმების 40%-ზე ნაკლებს აიღებს. ოპოზიციის განცხადებით, ერთადერთი თანაფარდობა, რომელიც უზრუნველყოს წარმომადგენლობის პროპორციულობას არის 130/20-ზე. მათი მთავარი მოთხოვნა იყო დაკავებული ოპოზიციონერების გათავისუფლებაც.

ქართულ ოცნებაში განაცხადეს, რომ 40%-იან ბარიერზე თანახმა არიან, რადგან 50%-ზე ნაკლების აღებას არ აპირებენ. საპასუხოდ მათ ოპოზიციას 110/40-ზე ფორმატი შესთავაზეს, თუმცა დაკავებულ ოპოზოციონერებს ისინი პოლიტპატიმრებად არ მიიჩნევენ. ამიტომ ოპოზიციამ მოლაპარაკებების მეხუთე რაუნდზე უარი განაცხადა.