საქართველოს ახალგაზრდა იურისტთა ასოციაციის განცხადებით, საქართველოს პარლამენტმა 2018 წელს თანამშრომელს შვებულებაზე უარი დაუსაბუთებლად უთხრა და სამსახურიდან გაათავისუფლა. როგორც ორგანიზაცია აცხადებს, აღნიშნული გადაწყვეტილება 26 თებერვალს ქუთაისის სააპელაციო სასამართლომ მიიღო.

საიას ინფორმაციით, სასამართლომ გააუქმა ადამიანის უფლებათა დაცვის კომიტეტის აპარატის წამყვანი სპეციალისტის გათავისუფლების შესახებ ბრძანება. ამავე დროს, პარლამენტს გარემოებების შესწავლის საფუძველზე ახალი გადაწყვეტილების მიღება დაევალა.

როგორც არასამთავრობო ორგანიზაციაში აცხადებენ, 2018 წლის მაისში მათი დაცვის ქვეშ მყოფმა აპარატის უფროსთან ანაზღაურების გარეშე შვებულება მოითხოვა:

"მოსარჩელე ასაბუთებდა, რომ სამუშაო ადგილას მის მიმართ შექმნილი იყო მტრული გარემო და იყო დისკრიმინაციის მსხვერპლი, რაზეც მიმდინარეობდა სასამართლო დავა. შექმნილი ვითარების გათვალისწინებით, მას სურდა, ესარგებლა ანაზღაურების გარეშე შვებულებით, ხოლო თუ მას არ მისცემდნენ ანაზღაურების გარეშე შვებულების გამოყენების უფლებას, ითხოვდა სამსახურიდან გათავისუფლებას".

საიაში განმარტავენ, რომ ანაზღაურების გარეშე ერთ წლამდე შვებულების გამოყენება საჯარო სამსახურის შესახებ კანონშია გაწერილი, თუმცა პარლამენტმა შვებულება არ დააკმაყოფილა და ის სამსახურიდან გაათავისუფლა.

თავდაპირველად პარლამენტის თანამშრომელმა გადაწყვეტილება ქუთაისის საქალაქო სასამართლოში გაასაჩივრა, რომელმაც სარჩელი არ დააკმაყოფილა. პირველი ინსტანციის სასამართლოს გადაწყვეტილება სააპელაციო სასამართლომ შეცვალა და მიიჩნია, რომ პარლამენტის არგუმენტები დამაჯერებელი არ იყო.