ახალგორელი სამოქალაქო აქტივისტი, თამარ მეარაყიშვილი ამბობს, რომ ცხინვალის დე ფაქტო პროკურატურამ ე.წ. უზენაესი სასამართლოს მიერ მოხსნილი ბრალი ხელახლა წაუყენა. საქმე ეხება მმართველი პარტია ედინაია ოსეტიას მიმართ ცილისწამების ბრალს. ბრალდების ხელახალი წარდგენის შესახებ თამარ მეარაყიშვილმა დღეს, 25 თებერვალს სხდომაზე შეიტყო.

"ძველი ბრალი წამიყენეს, რომელიც უკვე მომეხნა. უზენაესმა ცილისწამების ნაწილში გამამართლა, ბრალი მომეხსნა, მაგრამ რაკი დაბრუნდა პირველ ინსტანციაში საქმეები, ისიც დააბრუნეს. 3 მარტს გაიმართება მოწმე-დაზარალებულების დაკითხვა ცილისწამების საქმეზე", — ამბობს თამარ მეარაყიშვილი On.ge-სთან საუბრისას.

თამარ მეარაყიშვილის საქმე

მეარაყიშვილი 2017 წლის 16 აგვისტოს დააკავეს დე ფაქტო სამხრეთ ოსეთის მმართველი პოლიტიკური პარტიის ედინაია ოსეტიას მიმართ ცილისწამების ბრალდებით. მას შემდეგ ოთხი სასამართლო პროცესი ჩატარდა ცხინვალში, ბრალდებულის სახლი არაერთგზის გაიჩხრიკა, არაერთი დაკითხვა ჩატარდა, თუმცა გამოძიებამ მაინც ვერ შეძლო საკმარისი მტკიცებულების მოპოვება იმის დასამტკიცებლად, რომ მეარაყიშვილი დამნაშავეა.

მეორე საქმე აქტივისტის წინააღმდეგ აღიძრა მუხლით, რომელიც ოფიციალური დოკუმენტების, ჯილდოების, ბეჭდის, შტამპის, ბლანკის გაყალბებას ითვალისწინებს. ე.წ. უწყება ამტკიცებდა, რომ მეარაყიშვილმა დე ფაქტო რესპუბლიკის პასპორტი ქართული პასპორტის შენარჩუნებით აიღო, რაც აკრძალულია.

თამარს ყველანაირი დოკუმენტი ქონდა ჩამორთმეული და გადაადგილების უფლება შეზღუდული. მთელ დროს ის ახალგორში, საკუთარ სახლში ატარებდა და გარეთ გასვლას მხოლოდ სასამართლო პროცესზე ან დაკითხვაზე წასვლის შემთხვევაში ახერხებს, ისიც ადვოკატის თანხლებით.

2019 წლის 10 ივლისს დე-ფაქტო სასამართლომ მეარაყიშვილს ყველა ბრალდება მოუხსნა, მათ შორის გაუქმდა გადაადგილების შეზღუდვაც, თუმცა პროკურატურამ გადაწყვეტილება ზედა ინსტანციაში გაასაჩივრა.

2020 წლის 17 იანვარს დე ფაქტო უზენაესმა სასამართლომ დე ფაქტო პროკურატურის სარჩელი ნაწილობრივ დააკმაყოფილა და პირველ ინსტანციაში დააბრუნა. საქმე ეხება თვითაღიარებული რესპუბლიკის ყალბი პასპორტის დამზადებას.

რაც შეეხება მეორე ბრალდებას — მმართველი პარტიაზე ცილისწამება, დე ფაქტო უზენაესმა სასამართლომ ძალაში დატოვა ე.წ. ქვედა ინსტანციის გადაწყვეტილება, რომელმაც მეარაყიშვილი უდანაშაულოდ ცნო.