რუსეთის სახელმწიფო დუმამ ოკუპირებული აფხაზეთისა და რუსეთის გაერთიანებული ჯარების შესახებ შეთანხმების რატიფიცირება განახორციელა. აღნიშნული გადაწყვეტილება ორ მხარეს შორის მოკავშირეობისა და სტრატეგიული პარტნიორობის შესახებ შეთანხმების ფარგლებში ამავე შეთანხმებით დადგენილ ვადებში მიიღეს. ინფორმაციას Ekhokavkaza ავრცელებს.

დუმის მიერ რატიფიცირებული შეთანხმება მინიმუმ ათწლიან პერიოდს მოიცავს, ხოლო იმ შემთხვევაში თუ მოკავშირეობისა და სტრატეგიული პარტნიორობის შესახებ შეთანხმების ვადა 5 წლით ავტომატურად გაიზრდება, შესაძლოა გაერთიანებულ ჯარების არსებობაც გახანგრძლივდეს.

ორი მხარის გაერთიანებული სამხედრო დაჯგუფება იქმნება იმისთვის, რომ საჭიროების შემთხვევაში "შეიარაღებულ თავდასხმაზე (აგრესიაზე) ადეკვატური რეაგირება მოხდეს, ასევე იმ შემთხვევისთვის, თუ რომელიმე მხარის სამხედრო უსაფრთოხებას საფრთხე დაემუქრება".

გაერთიანებული სამხედრო დაჯგუფების შესახებ შეთანხმებას მხარეებმა ხელი 2015 წლის 21 ნოემბერს მოაწერეს, რის შემდეგაც რუსეთის პრეზიდენტმა ის დუმაში განსახილველად შეიტანა.