ცენტრალურმა საარჩევნო კომისიამ დღეს, 28 მარტს გამართულ სხდომაზე მიიღო გადაწყვეტილება, ოფიციალურად დარეგისტრირდეს მოქალაქეთა საინიციატივო ჯგუფის კითხვა რეფერენდუმისთვის შემდეგი ფორმულირებით: „გინდათ თუ არა, რომ ერთნაირ სქესიანთა ქორწინება დაშვებულ იქნას საქართველოში?“

როგორც On.ge-ს ცესკო-ში განუცხადეს, აღნიშნული გადაწყვეტილება არ ნიშნავს, რომ რეფერენდუმი ამ კითხვით საქართველოში აუცილებლად გაიმართება, უბრალოდ, ცესკო-მ კანონით დადგენილი პროცედურებით იხელმძღვანელა.

რეგისტრაციის შემდეგ, საინიციატოვო ჯგუფმა ცესკო-ს დადგენილი წესით 3 თვის ვადაში უნდა შეაგროვოს 200 ათასი ხელმოწერა და წარადგინოს ცენტრალურ საარჩევნო კომისიაში.

ცესკო-მ აღნიშნული დოკუმენტაცია უნდა შეამოწმოს და დოკუმენტების მიღებიდან არაუგვიანეს 1 თვის ვადისა, პრეზიდენტს უნდა წარუდგინოს გადაწყვეტილების მისაღებად.

კანონის თანახმად, სწორედ ამის შემდეგ, საქართველოს პრეზიდენტმა, ორი გადაწყვეტილებიდან უნდა მიიღოს ერთ-ერთი:

  1. ან უნდა დანიშნოს რეფერენდუმის თარიღი, სადაც მოქალაქეებმა უნდა გასცენ პასუხი კითხვას: „გინდათ თუ არა, რომ ერთნაირ სქესიანთა ქორწინება დაშვებულ იქნას საქართველოში?“
  2. ან გამოაქვეყნოს მოტივირებული გადაწყვეტილება რეფერენდუმის მოწყობის მოთხოვნაზე უარის თქმის შესახებ.

საინიციატივო ჯგუფის შემადგენლობაში, რომელსაც აღნიშნულ საკითხზე რეფერენდუმის ჩატარების სურვილი გაუჩნდა, არიან შემდეგი პირები: მოძრაობა სიცოცხლისთვის ხელმძღვანელი გიორგი ყორღანაშვილი, ზურაბ თოლორაია, კახა ნიქაბაძე, ბადრი კვირიკაშვილი, პეტრე გოგოსაშვილი, თეიმურაზ ცისკარიშვილი და დავით კუჭავა.