რუსეთის საბჭოს სენატორის, გრიგორი კარასინის განცხადებით, შესაძლოა, საქართველოში გამართულ მინისტერიალზე მათი საგარეო საქმეთა მინისტრი, სერგეი ლავროვი არ ჩამოვიდეს. მიზეზად კარასინი იმას ასახელებს, რომ საქართველოში საზოგადოება და ოპოზიცია "აღელვებულია".

იმედთან ინტერვიუში კარასინი აცხადებს, რომ რუსეთის დელეგაციას მინისტერიალში მონაწილეობაში ეჭვის შესატანად მიზეზი არ აქვს, თუმცა მონაწილეთა სტატუსი გასარკვევია.

"შეიძლება იყოს რუსეთის საგარეო საქმეთა მინისტრის მოადგილე ან რუსეთის ელჩი ევროპის საბჭოში. ეს ფართო მსჯელობის საგანი გახდა...

ამის მიზეზია, პირველ რიგში, ის, რომ ასეთი აღელვებულია თქვენი საზოგადოება და არის რაღაც, რაც დასაფიქრებელია. თქვენი ოპოზიცია აღელვებულია და სხვათაშორის ხელს უშლის სხვა პრაქტიკული საკითხების გადაჭრასაც", — განაცხადა მან.

საქართველომ, როგორც ევროპის საბჭოს მინისტრთა კომიტეტის თავმჯდომარე ქვეყანამ, მინისტერიალს 14-15 მაისს უნდა უმასპინძლოს. მინისტერიალის ფარგლებში შესაძლოა, რომ ქვეყანას რუსეთის დელეგაციის ისეთი წევრებიც ესტუმრონ, რომელთაც ოკუპირებული ტერიტორიების შესახებ კანონი აქვთ დარღვეული, მათ შორის შესაძლოა იყოს სერგეი ლავროვიც.

28 იანვარს საქართველოს პრეზიდენტმა ევროსაბჭოს საპარლამენტო ასამბლეის ტრიბუნიდან განაცხადა, რომ ქვეყანა რუსეთის დელეგაციას უმასპინძლებს, თუნდაც ამისთვის კანონისთვის "გვერდის ავლა" გახდეს საჭირო. მისი თქმით, ქვეყანა "ქართულ სტუმართმოყვარეობას" გამოავლენს.

პრემიერ-მინისტრმა, გიორგი გახარიამ კი განაცხადა, რომ "ვერავინ საქართველოს კანონმდებლობას გვერდს ვერ აუვლის". როგორ აპირებს ამას, პრემიერს არ დაუკონკრეტებია.