18 თებერვალს უკრაინის ხელისუფლებამ განაცხადა, რომ ქვეყნის აღმოსახლეთ ნაწილში მეამბოხეთა თავდასხმის შედეგად მათი ერთი სამხედრო დაიღუპა, ოთხი კი დაშავდა. მათივე ცნობით, მოკლულია ოთხი სეპარატისტი და დაიჭრა — ექვსი. შეტაკება ლუგანსკის რეგიონში, სოფელ ზოლოტესთან მოხდა.

უკრაინის პრეზიდენტის, ვოლოდიმირ ზელენსკის თქმით, სეპარატისტული ძალების პროვოკაციები ხელს ვერ შეუშლის კიევს, მიაღწიოს მშვიდობას:

"დღეს დილით თავს დაესხნენ გაერთიანებული ძალების პოზიციებს. მათ გამოიყენეს იარაღი, რაც მინსკის შეთანხმებით აკრძალულია... ჩვენ განვიხილავთ და გადავწყვიტავთ მომდევნო ნაბიჯებს. ჩვენი არჩეული კურსი, რომ დასრულდეს ომი და შესრულდეს საერთაშორისო შეთანხმებები, უცვლელია".

რუსეთის მიერ მხარდაჭერილი სეპარატისტები ცეცხლის გახსნაში კიევს ადანაშაულებენ და აცხადებენ, რომ უკრაინული ძალები მათ მიერ კონტროლირებად ტერიტორიაზე გადასვლას ცდილობდნენ, რა დროსაც აფეთქდნენ.

უკრაინის აღმოსავლეთით განვითარებულ მოვლენებს ევროკავშირი გამოეხმაურა. მათ მოუწოდეს რუსეთს უკანონო შეიარაღებული ფორმირებების მიმართ ზემოქმედება მოახდინოს, რათა სრულად შესრულდეს ცეცხლის შეწყვეტის შეთანხმება.

"ცნობები იმის შესახებ, რომ დონბასში იყო სამხედრო ესკალაცია, გამოიყენეს იარაღი, რაც აკრძალულია მინსკის შეთანხმებით, უკიდურესად შემაშფოთებელია", — განაცხადა უკრაინაში ევროკავშირის ელჩმა, მაატი მაასიკასმა.

უკრაინის კონფლიქტს ტვიტერზე გამოეხმაურა საქართველოს პრეზიდენტი, სალომე ზურაბიშვილი. მისი თქმით, საომარი მოქმედებების განახლება უკრაინის ტერიტორიული მთლიანობისა და ეროვნული სუვერენიტეტის დარღვევაა.

ესტონეთის პრეზიდენტი, კერსტი კალიულაიდი ტვიტერზე წერს, რომ რუსეთის მიხერ მხარდაჭერილი ძალების მიერ მინსკის შეთანხმების დარღვევა საერთაშორისო საზოგადოებამ უნდა დაგმოს:

"უკრაინა ცხელ ომს აწარმოებს შუაგულ ევროპაში. ეს არის პრინციპებისა და ღირებულებების ომი. ჩვენ უკრაინის ირგვლივ უნდა გავერთიანდეთ", — წერს ესტონეთის პრეზიდენტი.

აღმოსავლეთ უკრაინის კონფლიქტი 2014 წლის შემდეგ მიმდინარეობს. ომს 13 ათასზე მეტი ადამიანი ემსხვერპლა.