პრეზიდენტი სალომე ზურაბიშვილი პოლიტიკურ დიალოგში ჩართვასთან დაკავშირებით ფასილიტატორ ელჩებს შეხვდა. შეხვედრას ესწრებოდნენ ევროკავშირის ელჩი საქართველოში კარლ ჰარცელი, ევროპის საბჭოს ელჩი კრისტიან ურსი, აშშ-ს ელჩი კელი დეგნანი და გერმანიის ელჩის მოვალეობის შემსრულებელი მიხაელ ფაბრი.

როგორც პრეზიდენტის ადმინისტრაცია ინფორმაციას ავრცელებს, მხარეებმა შეხვედრაზე საქართველოში მიმდინარე პროცესებთან დაკავშირებით ინფორმაცია გაცვალეს. გარდა ამისა, პრეზიდენტმა კიდევ ერთხელ გამოთქვა მზადყოფნა, რომ მზადაა შერიგების პროცესში ჩაერთოს.

ქართულ ოცნებასა და ოპოზიციის წარმომადგენლებს შორის დიალოგი საერთაშორისო პარტნიორების ინიციატივით დაიწყო. მხარეები შეხვედრებზე საარჩევნო სისტემას განიხილავდნენ, თუმცა შეთანხმება ვერ მოხდა. ქართული ოცნება ოპოზიციას 100/50-ზე სისტემას სთავაზობდა და ამბობდა, რომ თუ ოპოზიცია ამ შეთავაზებას არ დათანხმდებოდა არჩევნები არსებული სისტემით ჩატარდებოდა.

საარჩევნო სისტემასთან დაკავშირებით ოპოზიციამ დიალოგი მას შემდეგ შეწყვიტა, რაც უზენაესმა სასამართლომ გიგი უგულავას პატიმრობა შეუფარდა.