"ტრამპი 2024... 2088...2300... 2800...10 000... 80 000... ტრამპი სამუდამოდ" — ამ შინაარსის იუმორისტული ვიდეოთი ეხმაურება ამერიკის პრეზიდენტი სენატში მის სასარგებლოდ დასრულებულ კენჭისყრას.

დონალდ ტრამპმა ტვიტერზე დაწერა, რომ ოფიციალურ განცხადებას იმპიჩმენტის პროცესში "ქვეყნის გამარჯვებასთან" დაკავშირებით ხვალ, თეთრ სახლში გააკეთებს.

ცოტა ხნის წინ სენატმა დონალდ ტრამპი ძალაუფლების ბოროტად გამოყენებისა და კონგრესისთვის გამოძიებაში ხელის შეშლის ბრალდებებში გაამართლა. ხმები შემდეგნაირად გადანაწილდა: უფლებამოსილების გადამეტების საკითხში — 52-48, ხოლო კონგრესისთვის ხელის შეშლის ბრალდებაზე — 53-47. იმისთვის, რომ სენატს დონალდ ტრამპი დამნაშავედ ეცნო, ხმების ორი მესამედი იყო საჭირო. ნომებერში ტრამპი გახდება პირველი პრეზიდენტი, რომელიც იმპიჩმენტის მოთხოვნის შემდეგ არჩევნებში მიიღებს მონაწილეობას.

იმპიჩმენტის საფუძველი

ტრამპის იმპიჩმენტის დაწყების მიზეზი მისი და უკრაინის პრეზიდენტის, ვოლოდიმირ ზელენსკის სატელეფონო საუბარი გახდა, რომელიც ივლისში შედგა, თუმცა მისი დეტალური შინაარსი მხოლოდ სექტემბერში გახდა ცნობილი.

საუბრის დროს ტრამპმა ზელენსკის უთხრა, გამოძიება დაეწყო 2020 წლის არჩევნებში მისი სავარაუდო კონკურენტის, ჯო ბაიდენისა და მისი შვილის, ჰანტერ ბაიდენის წინააღმდეგ. გარდა ამისა, ცნობილი გახდა, რომ სატელეფონო საუბრამდე ერთი კვირით ადრე აშშ-ს პრეზიდენტმა უკრაინისთვის სამხედრო დახმარება ორი თვით შეაჩერა.

აშშ-ს პრეზიდენტმა დახმარების შეჩერება აღიარა და გადაწყვეტილება დაასაბუთა იმით, რომ ევროპის სხვა ქვეყნები, როგორიცაა გერმანია და საფრანგეთი, უკრაინას არასათანადოდ ეხმარებიან. სექტემბრის შუა რიცხვებში კი 400 მილიონი დოლარის დახმარება უკრაინამ, საბოლოოდ, მიიღო.

ყოფილი ვიცე-პრეზიდენტი ჯო ბაიდენი 2020 წლის საპრეზიდენტო არჩევნებში დონალდ ტრამპის მთავარ კონკურენტად განიხილება. მისი შვილი ჰანტერ ბაიდენი 2014-2019 წლებში კომპანია ბურისმაში დირექტორთა საბჭოს წევრი იყო. ყოფილმა გენპროკურორმა ვიქტორ შოკინმა კომპანიის მფლობელის, ნიკოლაი ზლოჩევსკის წინააღმდეგ სისხლისსამართლებრივი დევნა დაიწყო. უკრაინის ხელისუფლებამ ბურისმას საქმე 2017 წელს დაასრულა და ვერანაირი დარღვევა ვერ გამოავლინა.

შოკინის საქმიანობით დასავლეთში არაერთი ლიდერი იყო უკმაყოფილო, რადგან ამბობდნენ, რომ ის კორუფციას არასათანადოდ იძიებდა. 2015 წლის დეკემბერში კიევში ვიზიტისას ჯო ბაიდენმა შოკინის გათავისუფლებაც მოითხოვა. საბოლოოდ, გენპროკურორი თანამდებობიდან 2016 წელს გადააყენეს.