ყოფილი მთავარი პროკურორის, ირაკლი შოთაძის გასაუბრების პარალელურად, პროკურატურასთან საპროტესტო აქცია იმართება. არასამთავრობო ორგანიზაცია ადამიანის უფლებათა ცენტრის წარმომადგენლები აპროტესტებენ იმ ფაქტს, რომ შოთაძეს ისევ სურს უწყების მართვა, რომელიც თავადვე დატოვა.

"მოითხოვე დეპოლიტიზირებული პროკურორი", "არა მარიონეტებს", "შოთაძის დაბრუნება დანაშაულია" — ამ და სხვა საპროტესტო პლაკატებით ისინი პროკურატურის შესასვლელთან დგანან. ასოციაციის წევრის, ნესტან ლონდარიძის განცხადებით, აქ შეიკრიბნენ რადგან, შიგნით შესვლის უფლება არ აქვთ, ამიტომ სურთ საჯაროდ გააჟღერონ კითხვა, რომელზეც შოთაძის პასუხი აინტერესებთ.

"იმ შემთხვევაში, თუ პროკურატურას მოუწევს სამოხელეო დანაშაულზე მუშაობა, საინტერესოა რა პოზიცია ექნება იმ ირაკლი შოთაძეს ამასთან დაკავშირებით, რომელიც მთავარ ფიგურად წარმოგვიდგენია, სწორედ ამ სამოხელეო დანაშაულში", — განაცხადა ნესტან ლონდარიძემ.

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა. გენერალური პროკურორობა 16 კანდიდატს სურს.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო.

არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.