თბილისის საქალაქო სასამართლოში პროევროპული აქციების დროს დაკავებული 11 პირის სასამართლო პროცესის დაიწყო. როგორც ადგილიდან NEWS.On.ge-ს ჟურნალისტი იტყობინება, დაკავებულთა ადვოკატებმა შუამდგომლობა დააყენეს გადაიდოს პროცესი და უფრო დიდ დარბაზში ჩატარდეს.

მსახიობ ანდრო ჭიჭინაძის ადვოკატის თქმით, სპეციალურად პატარა დარბაზია შერჩეული, ტექნიკური პრობლემების გამო პროცესი დიდ დარბაზში ვერ ტარდება, მაგრამ ვერ სახელდება რა ტექნიკური პრობლემებია. ამ მიზეზით სასამართლოს დარბაზში, სადაც პროევროპულ აქციებზე დაკავებული 11 პირის საქმის განხილვა დაიწყო, დაკავებულთა მხარდამჭერების უმრავლესობამ შესვლა ვერ შეძლო.

"ეს არის სამართლიანი სასამართლოს უფლების დარღვევა. არსებობს დარბაზი, რომელიც იძლევა იმის საშუალებას, რომ საზოგადოება დაესწროს, თუმცა, იქ არ ატარებენ პროცესს.

ტექნიკური საკითხების გამო ვერ ხერხდება პროცესის დაწყებაო, ამბობენ", — განაცხადა ადვოკატმა თორნიკე მიგინეიშვილმა.

ამის პარალელურად, სასამართლოსთან საპროტესტო აქციებზე დაკავებულების, მათ შორის მსახიობ ანდრო ჭიჭინაძისა და იუმორისტ ონისე ცხადაძის მხარდასაჭერად ახლობლები და მსახიობები იკრიბებიან. მათ მოთხოვნა რეჟიმის უკანონო პატიმრების გათავისუფლებაა.

"არ მინდა რაღაცით თავი დავიიმედო, რადგან არ მაქვს ჯერ რაღაც მოლოდინი. ვნახოთ, რა იქნება. ყველა მნიშვნელოვანია, მაგრამ ამ შემთხვევაში, ჩემთვის ანდრო ჭიჭინაძე არის მნიშვნელოვანია, იმიტომ, რომ ანდრო ჩემი თეატრის მსახიობია. ვიცი, რომ ის მხნედ არის და ყველაფერი კარგად იქნება, თავს ვიმშვიდებ", — განაცხადა რეჟისორმა დავით დოიაშვილმა ჟურნალისტებთან.

როგორც პროცესის დაწყებამდე ანდრო ჭიჭინაძის ადვოკატმა, თორნიკე მიგინეიშვილმა განაცხადა, დაცვის მხარე ერთადერთ მოთხოვნას აყენებს და ეს მოთხოვნა მისი დაცვის ქვეშ მყოფი ანდრო ჭიჭინაძის დაუყოვნებლივ, სასამართლო დარბაზიდან, გათავისუფლებაა. თუმცა, თუ სასამართლო ამ მოთხოვნას არ დააკმაყოფილებს, შესთავაზებენ გირაოს.

"პროკურატურა, სავარაუდოდ, ანდრო ჭიჭინაძის პატიმრობაში დატოვებას მოითხოვს, რაც სრულად დაუსაბუთებელი იქნება, ვინაიდან თვეზე მეტია გასული და არც ერთი საგამოძიებო მოქმედება არ აქვს ჩატარებული პროკურატურას და არც ერთი მტკიცებულება არ დევს საქმეში იმისა, რომ რაიმე ბრალეულობაა სახეზე.

ჩვენ ვაყენებთ ერთადერთ მოთხოვნას - დაუყოვნებლივ სასამართლო დარბაზიდან გათავისუფლდეს ანდრო ჭიჭინაძე, ვინაიდან არ არის არანაირი საფუძველი იმისა, რომ პატიმრობა გაგრძელდეს. თუმცა მაინც შევთავაზებთ სასამართლოს გირაოს, თავად განსაზღვროს გირაოს ოდენობაც. თუ ჩვენი მოთხოვნა მისი სასამართლო დარბაზიდან დაუყოვნებლის გათავისუფლების შესახებ არ დაკმაყოფილდება, შემდგომ იმსჯელოს გირაოს ნაწილზე", — ამბობს მიგინეიშვილი.

მისივე თქმით, პროცესის ინტერესი არის პოლიტიკური და სურთ, რომ ანდრო როგორც სამაგალითო პიროვნება სამაგალითოდ დაისაჯოს.

დღევანდელ პროცესზე 11 დაკავებულის სისხლის სამართლის საქმე გაერთიანდა. ესენი არიან: ანდრო ჭიჭინაძე, ჯანო არჩაია, რუსლან სივაკოვი, ლუკა ჯაბუა, გურამ მირცხულავა, ონისე ცხადაძე, ვალერი თეთრაშვილი, გიორგი ტერიშვილი, ირაკლი ქერაშვილი, რევაზ კიკნაძე, სერგეი კუხარჩუკი.

11-ვე დაკავებულს ბრალი საქართველოს სისხლის სამართლის კოდექსის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს. მუხლი სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.