დღეს, 10 იანვარს, საქალაქო სასამართლოში საპროტესტო აქციებზე სისხლის სამართლის წესით დაკავებული 11 პირის სასამართლო პროცესი გაიმართება. ესენი არიან: ანდრო ჭიჭინაძე, ჯანო არჩაია, რუსლან სივაკოვი, ლუკა ჯაბუა, გურამ მირცხულავა, ონისე ცხადაძე, ვალერი თეთრაშვილი, გიორგი ტერიშვილი, ირაკლი ქერაშვილი, რევაზ კიკნაძე, სერგეი კუხარჩუკი.

მსახიობ ანდრო ჭიჭინაძის ადვოკატის, თორნიკე მიგინეიშვილის თქმით, სასამართლომ დააკმაყოფილა პროკურატურის დაუსაბუთებელი შუამდგომლობა და ანდრო ჭიჭინაძის პროცესი გადადო 5 მარტისთვის. 10 იანვარს კი განიხილება აღკვეთის ღონისძიების სახით გამოყენებული პატიმრობის ძალაში დატოვების საკითხი, ანუ მოსამართლე იმსჯელებს დატოვებს თუ არა მსახიობს და დანარჩენ 10 პირს ციხეში. პროცესის 10:30 საათზეა ჩანიშნული.

თორნიკე მიგინეიშვილის თქმით, საქმეები გაერთიანდა ერთ წარმოებად უკანონოა.

"დაპატიმრებული პირები ერთმანეთს არ იცნობენ, მაშინ როცა ბრალად წარდგენილი აქვთ ჯგუფურ ძალადობაში მონაწილეობა. გამოძიებამ 11 პირის სისხლის სამართლის საქმე ხელოვნურად გააერთიანა. ამით პროკურატურა ქმნის ხელოვნურ სურათს რომ საქმე მოცულობითია (დიდია) და სურს მუდმივად ამ არგუმენტით მოითხოვოს პროცესის გადადება.

ანდრო ჭიჭინაძის დაკავებიდან 1 თვეზე მეტია გასული (გამოძიების დაწყებიდან კი უფრო მეტი), გამოძიების ორგანო კი ამბობს რომ მტკიცებულებების მოსაპოვებლად დრო საკმარისი არ არის", — წერს ანდრო ჭიჭინაძის ადვოკატი.

ამის პარალელურად, ანდრო ჭიჭინაძის და პატიმრობაში მყოფი სხვა პირების ოჯახის წევრები და მხარდამჭერები, 10 იანვარს, 10:00 საათზე საქალაქო სასამართლოსთან მისვლას გეგმავენ და ამით სურთ, რომ სოლიდარობა გამოხატონ პროევრუპულ აქციებზე დაკავებული პირები მიმართ.

11-ვე დაკავებულს ბრალი საქართველოს სისხლის სამართლის კოდექსის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს. მუხლი სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.