"ქეთევან ჯაჭვაძევ, სირცხვილია! და თქვენი სახელი არავის უნდა დაავიწყდეს!", — ასე ეხმაურება საქართველოს მეხუთე პრეზიდენტი სალომე ზურაბიშვილი მოსამართლე ქეთევან ჯაჭვაძეს გადაწყვეტილებას პროევროპულ აქციებზე დაკავებული 11 მოქალაქის პატიმრობაში დატოვებასთან დაკავშირებით.

"ქეთევან ჯაჭვაძევ! სირცხვილია ! და თქვენი სახელი არავის უნდა დაავიწყდეს!
ჯგუფური ძალადობა არის ის, რასაც თქვენ და მთლიანად სასამართლო სისტემა აწარმოებთ საქართველოს თითოეულ მოქალაქეს წინააღმდეგ. მონობა იცოდეთ ცუდად თავდება ! kafka როგორც სჩანს არ წაგიკითხავთ, მაგრამ ისტორიას მაინც გადახედეთ!", — წერს ზურაბიშვილი სოციალურ ქსელში.

ცნობისთვის, დღეს თბილისის საქალაქო სასამართლოში, პროევროპულ აქციებზე დაკავებული 11 პირის სასამართლო სხდომა გაიმართა.

მოსამართლე ქეთევან ჯაჭვაძეს მიერ მიღებული გადაწყვეტილებით, პატიმრობაში რჩებიან ბრალდებულები: ანდრო ჭიჭინაძე, ონისე ცხადაძე, რევაზ კიკნაძე, გურამ მირცხულავა, ლუკა ჯაბუა, ჯანო არჩაია, რუსლან სივაკოვი, ვალერი თეთრაშვილი, გიორგი ტერიშვილი, ირაკლი ქერაშვილი და სერგეი კუხარჩუკი.