პროდიუსერი ელენე (ბაკა) კვირცხალია იხსენებს, რომ კინოცენტრის პროტესტის დროს, საზოგადოებრივი მაუწყებლის გადაცემა "ნატალია და დათუნას" ეთერიდან მსახიობ ანდრო ჭიჭინაძის პროტესტის "ამოჭრა მოუწია".

"პირველ არხზე მუშაობა ჯერ კიდევ სკოლის ასაკიდან დავიწყე. პრაქტიკულად ყველა ხელისუფლების და ყველა ხელმძღვანელობს პერიოდში მომიწია აქ მუშაობამ. არასდროს ისეთი მძიმე არ ყოფილა ჩემთვის ამ არხზე მუშაობა, როგორც ამ პერიოდში იმიტომ, რომ არასოდეს მოუთხოვიათ ჩემთვის მოსაწვევი სტუმრებს სიების კონტროლი და გადაცემიდან ვიღაცისთვის არასასურველი ფრაზების ამოჭრა. ძალიან სიმბოლურია, რომ ამის თქმა მიწევს, რადგან ამ წუთებში მიმდინარეობს ანდრო ჭიჭინაძის სასამართლო და ერთ-ერთი იყო სწორედ ანდრო, რომელმაც გამოხატა ჩემთან გადაცემაში პროტესტი. მაშინ კინოცენტრის პრობლემები იყო. ზუსტად ორ წინადადებაში ადამიანმა ძალიან ლაკონიურად და ძალიან მშვიდად გამოხატა ეს პროტესტი და მომიწია ამის ამოჭრა", — ამბობს ელენე კვირცხალია საზოგადოებრივი მაუწყებლის პროფესიონალთა გაერთიანების გვერდზე, GPB Guardians-ზე გამოქვეყნებულ ვიდეოში.


მისი თქმით, ეს [ცენზურის] ერთ-ერთი შემთხვევა იყო.


"ჩემი სოლიდარობა ანდროს და ყველა იმ ადამიანს, ვინც ახლა იქ არის. ნიკა კაცია მინდა გამოვყო — ჩემი უახლოესი მეგობარი, რომელიც ახლა მძიმე პირობებშია. ძალიან გული მწყდება, ძალიან ვამაყობ, რომ საზოგადოებრივი მაუწყებლის თანამშრომელი ვარ და არ მინდა, ასე გრძელდებოდეს. მინდა, რომ რადიკალურად შევცვალოთ ყველაფერი", —აცხადებს პროდიუსერი ელენე (ბაკა) კვირცხალია.

აღნიშნულ განცხადებასთან დაკავშირებით საზოგადოებრივ მაუწყებელს კომენტარი ამ დრომდე არ გაუკეთებია.

პასუხის მიღების შემთხვევაში მასალა განახლდება.