Peacock-მა ცოტა ხნის წინ შონ ქომბსზე გადაღებული დოკუმენტური ფილმის ტრეილერი გააზიარა სახელწოდებით: Diddy: The Making of a Bad Boy. ახალი, 90 წუთიანი დოკუმენტური ფილმის პრემიერა 14 იანვარს შედგება და ის მოიცავს ინტერვიუებს დიდის ბავშვობის მეგობართან, ყოფილ მცველთან, ვიზაჟისტთან, პროდიუსერთან, სტაჟიორთან და "Making the Band"-ის გამარჯვებულთან. ფილმი მოგვითხრობს რეპერის ისტორიას, თუ როგორ გამოიყენა მან ფული, ძალა და გავლენა, რათა გამხდარიყო ის, რასაც ბევრმა "მონსტრი" უწოდა.

"Diddy: The Making of a Bad Boy-ში შონ ქომბსის დაუმუშავებელი, ექსკლუზიური სახეა აღწერილი. როგორი იყოს ის დიდი ხნით ადრე, სანამ ცნობილი გახდებოდა. ფილმში წარმოდგენილია ექსკლუზიური კადრები და ისტორიები მათგან, ვინც რეპერს ყველაზე კარგად იცნობს. ფილმი ნათელს ჰფენს მის ბავშვობას, დიდების მოსაპოვებლად განვლილ გზასა და ბოლოდროინდელ კრიმინალურ ბრალდებებს, აიძულებს მაყურებლებს გადახედონ ყველაფერს, რასაც აქამდე ფიქრობდნენ, რომ იცოდნენ" — ვკითხულობთ ფილმის აღწერაში

ქომბსის იმპერიამ ნგრევა სექტემბერში მას შემდეგ დაიწყო, რაც ის შეთქმულებისა და სექსუალური ტრეფიკინგის ბრალდებით დააკავეს. ფედერალური ხელისუფლება ამტკიცებს, რომ Bad Boy Records-ის დამფუძნებელმა, თავისი სტატუსი მუსიკალურ ინდუსტრიაში სექსუალური ძალადობისა და ექსპლუატაციის მიზნით გამოიყენა.

ეს იქნება პირველი დოკუმენტური ფილმი დიდის სექსუალური ძალადობის ბრალდებებზე, რომელიც 2025 წელს გამოვა. ამასობაში კი, დიდის შესახებ კიდევ რამდენიმე დოკუმენტური ფილმის გადაღება მიმდინარეობს, მათ შორის ერთ-ერთს Netflix-თვის 50 Cent-ის საპროდიუსერო კომპანია ამზადებს.

ასევე იხილეთ: