"6 წლით თავისუფლების აღკვეთას უსჯით ადამიანებს ქვის და ბოთლის, ან დამრგვალებული ქაღალდის ჰაერში სროლისთვის?", — ამ კითხვით მიმართა ჯგუფურ ძალადობაში მონაწილეობის ბრალდებით დაკავებულმა რევაზ კიკნაძემ სასამართლო სხდომაზე სიტყვით გამოსვლისას მოსამართლე ქეთევან ჯაჭვაძეს.

როგორც კიკნაძე აღნიშნავს, საქმეში არანაირი მტკიცებულება არ არსებობს, რაც ჯგუფურობას ან ძალადობას დაადასტურებს.

"აქციაზე ყოველდღე დავდიოდი, ნიღაბი კი არა, პირბადეც არ მკეთებია. რა მიმალვის საფრთხე, ვის დავემალები, პირიქით, ყველამ გაიგოს.

ჯგუფური ძალადობაო — რას ნიშნავს ან ჯგუფური, ან ძალადობა? არცერთში მიმიღია მონაწილეობა. 50 დაკავებულიდან არცერთთან ზარი არ განმიხორციელებია, არანაირი სახის კონტაქტი არ მქონია, არგუმენტის მაგვარიც არაა ჯგუფურ ძალადობასთან დაკავშირებით.

საერთოდ არ ვთვლი, რომ გირაო უნდა გადავიხადო, აქეთ ვარ დაზარალებული, მე რატომ უნდა ვიხადო გირაო, მაგრამ იმის გამო, რომ მშობლები ნერვიულობენ, 2000 ლარს გადავიხდი. საერთოდ ვერ ვხვდები რისთვის ვისჯებით სამშობლოს სიყვარულისთვის გულანთებული ამდენი ადამიანი? 6 წლით თავისუფლების აღკვეთას უსჯით ადამიანებს ქვის და ბოთლის, ან დამრგვალებული ქაღალდის ჰაერში სროლისთვის? 6 წლის შემდეგ ცირკში არ ვყოფილვარ და არ მეგონა 27 წლის ასაკში თუ მომიწევდა", — განაცხადა კიკნაძემ.

შეგახსენებთ, ამ წუთებში თბილისის საქალაქო სასამართლო აქციების საქმეზე დაკავებული 11 ბრალდებულის: ანდრო ჭიჭინაძის, ონისე ცხადაძის, რევაზ კიკნაძის, გურამ მირცხულავას, ლუკა ჯაბუას, ჯანო არჩაიას, რუსლან სივაკოვის, ვალერი თეთრაშვილის, გიორგი ტერიშვილის, ირაკლი ქერაშვილისა და სერგეი კუხარჩუკის საქმეს განიხილავს.