საქართველოს სახალხო დამცველმა ნინო ლომჯარიამ დეკანოზ გიორგი მამალაძესთან შეხვედრის შემდეგ თქვა, რომ ის დროებით შიმშილობას წყვეტს.

"ჩემი თხოვნის შედეგად დეკანოზმა დამიდასტურა, რომ წყვეტს შიმშილობას დროებით. ჩვენ ძალიან ბევრ საკითხზე ვიმსჯელეთ, რომლის დეტალებსაც ახლა არ ვიტყვი. ძალიან მაშფოთებს მისი ჯანმრთელობის მდგომარეობა, მას არ აქვს პროგრესი, უარესდება კიდეც, ეს ინფორმაცია მისი მკურნალი ექიმისგან მაქვს. ის მკურნალობა, რაც მას გაეწია, ფაქტია, ვერ აღწევს შესაბამის შედეგს. მისი მოთხოვნაა, ჩაუტარდეს ადეკვატური მკურნალობა. მისი განცხადებით, სხვა დანარჩენი საკითხი ნაკლებად პრიორიტეტულია", — თქვა ნინო ლომჯარიამ ჟურნალისტებთნ საუბრისას.

სახალხო დამცველის თქმით, შეხვედრის შემდეგ იმსჯელებენ რა ზომებს შეიძლება მიმართოს სახალხო დამცველმა. მისი აზრით, გიორგი მამალაძეს ნამდვილად სჭირდება სამედიცინო დახმარება, რომლის გაწევაც აქ ვერ ხერხდება. ომბუდსმენის თქმით, საუბარია სასჯელის გადავადებაზეც, ექიმი ადასტურებს ფაქტს, რომ გიორგი მამალაძე პარალიზებულია.

დეკანოზმა გიორგი მამალაძემ შიმშილობა 6 იანვარს, მას შემდეგ დაიწყო, რაც ის პრეზიდენტმა არ შეიწყალა. დეკანოზ მამალაძის შეწყალების შუამდგომლობით პრეზიდენტს სინოდმა თითქმის ორი წლის შემდეგ, ოქტომბერში მიმართა.

გიორგი მამალაძის გათავისუფლების მოთხოვნით მის ძმას, თორნიკეს მამალაძეს სექტემბრიდან პარლამენტის წინ კარავი ჰქონდა გაშლილი.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.