ბოდბელი მთავარ ეპისკოპოსი, მეუფე იაკობი აცხადებს, რომ ექიმი ვაჟა გაფრინდაშვილი უკანონო პატიმრობიდან მთელმა საქართველომ და მთელმა მსოფლიომ გაათავისუფლა. ამის შესახებ მან საკვირაო ქადაგების დროს ისაუბრა.

"რაღაც შეჯიბრიც ჰქონდათ ერთმანეთში, კარგი გაგებით, ვინ უფრო მეტს გააკეთებდა მისთვის და, საერთოდ, ჩვენი ხალხი გაცილებით მეტია, ვიდრე ყველა პარტია ერთად აღებული. ყველას დიდ მადლობას ვუხდი და არ შემიძლია, განსაკუთრებული მადლობა არ გადავუხადო ჩვენს მოჭიდავეებს, ვიცი, რასაც ვამბობ. გუშინ მეღიმებოდა, ვისმენდი, ყველას უნდოდა, თავის თავზე ეთქვა, მე გავათავისუფლე, მე გავათავისუფლეო. მერწმუნეთ, მთელმა საქართველომ გაათავისუფლა, მთელმა მსოფლიომ გაათავისუფლა", — განაცხადა მეუფე იაკობმა.

28 დეკემბერს 48-დღიანი უკანონო პატიმრობის შემდეგ ვაჟა გაფრინდაშვილი საოკუპაციო ძალებმა გაათავისუფლეს.

ვაჟა გაფრინდაშვილი საოკუპაციო ძალებმა 9 ნოემბერს კასპის რაიონში დააკავეს. ის ოკუპირებულ რეგიონში პაციენტის სანახავად მიდიოდა.

საოკუპაციო რეჟიმმა ექიმ ვაჟა გაფრინდაშვილს 1 წლითა და 9 თვით უკანონო პატიმრობა მიუსაჯა. დე ფაქტო სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებს და აცხადებს, რომ საქართველოს ტერიტორიაზეა.

საოკუპაციო რეჟიმს ვაჟა გაფრინდაშვილის გათავისუფლებისკენ მოუწოდა არაერთმა ქვეყანამ, მათ შორის, ლიეტუვის საგარეო საქმეთა მინისტრმა, ლინას ლინკევიჩუსმა და აშშ-ს მთავრობამ.

ამავე თემაზე: