უკანონო პატიმრობიდან გათავისუფლებულმა ვაჟა გაფრინდაშვილმა თქვა, რომ მან არ აღიარა წარდგენილი ბრალი და პირვანდელ პოზიციაზე დარჩა. ამაზე მან დღეს, 28 დეკემბერს პრესკონფერენციაზე ისაუბრა. ვაჟა გაფრინდაშვილმა თქვა ისიც, რომ შეწყალების თხოვნა გუშინ საღამოს 7 საათზე დაწერა, თუმცა ბრალი არ უღიარებია:

"ჩემი აზრით, წელიწადი და 9 თვე მომისაჯეს არა საქციელის გამო, არამედ, იმისათვის, რასაც ვამბობდი. ჩემი პოზიცია იყო პირველივე დღიდან ის, რომ მე არ დამიტოვებია საქართველოს საზღვარი. მე ვიცი როგორ ხდება საზღვრის გადაკვეთა... პირველივე დღესვე ვეუბნებოდი, რომ არ დამიტოვებია საქართველოს ტერიტორია, რომ მე ვიყავი რუსეთის მიერ საქართველოს ოკუპირებულ ტერიტორიაზე ".

ექიმი იხსნებს წერილსაც, რომელიც დე ფაქტო პრეზიდენტს, ანატოლი ბიბილოვს მიწერა შეწყალების თხოვნით:

"მე იმ წერილში მიწერია, რომ დამაკავეს ტერიტორიაზე რუსებმა, მომისაჯეს ამდენი და გთხოვთ, გამათავისუფლოთ".

ვაჟა გაფრინდაშვილმა გაიხსენა გათავისუფლების დილაც. ის ამბობს, რომ არ ელოდა ამ ყველაფერს:

"დილით დაახლოებით 10-ის 20- წუთი იყო, დაცვა შემოვიდა, ნახა ნივთებიდ ა მკითხა, ყველაფერი შენიაო? კი-მეთქი... უფროსი გეძახის და გაგიშვესო. ბარგიც არ ჩამილაგებია, იქ მყონდა რამდენიმე შოკოლადი, მიწისთხილი და რაღაცები ახალი წლისთვის. ცხადია, იქნებოდა პატარა ზეიმივით და ვფიქრობდი, საერთო სუფრაზე შევიტანდი ან თუ ადრე გამომიშვებდნენ, ვინმეს დავუტოვებდი".

ვაჟა გაფრინდაშვილის თქმით, ოკუპირებულ ტერიტორიაზე ავადმყოფის სანახავად გადავიდა, თუმცა უსაფრთხოების გამო მის ვინაობას არ ამბობს:

"ერთ-ერთი მთავარი მიზეზი რაც იყო, ესაა ჩემი ავადმყოფის ნახვა. ვერ ვიტყვი გვარს... რომ დამაკავეს იქ ვუთხარი მიზეზი, რომ ეკლესიის ნახვა მინდოდა სოფელ მონასტერში".

ვაჟა გაფრინდაშვილი იხსნეებს, რომ პირველი ოთხი დღე მესაზღვრეების ბაზაზე, დაკავების იზოლატორში იყო, კიდევ სამ პატიმართან ერთად. შემდეგ კი იზოლატორში გადაიყვანეს. ექიმი ჰყვება, რომ განსაკუთრებული ზეწოლა და ცუდი დამოკიდებულება არ უნახავს.

დღეს, 28 დეკემბერს 48-დღიანი უკანონო პატიმრობის შემდეგ ვაჟა გაფრინდაშვილი საოკუპაციო ძალებმა გაათავისუფლეს. ექიმი უკვე საქართველოს ცენტრალური ხელისუფლების მიერ კონტროლირებად ტერიტორიაზეა ოჯახთან ერთად.

ვაჟა გაფრინდაშვილი საოკუპაციო ძალებმა 9 ნოემბერს კასპის რაიონში დააკავეს. ის ოკუპირებულ ტერიტორიაზე ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. ოკუპირებულ ახალგორში მცხოვრები 60 წლის ქალი ჭაში ჩავარდა და დაზიანებები მიიღო, თუმცა თბილისში ვერ გადაიყვანეს, რადგან საოკუპაციო რეჟიმს ე.წ. გამშვები პუნქტი ჩაკეტილი ჰქონდა.

საოკუპაციო რეჟიმმა ექიმ ვაჟა გაფრინდაშვილს 1 წლითა და 9 თვით უკანონო პატიმრობა მიუსაჯა. დე ფაქტო სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებს და აცხადებს, რომ საქართველოს ტერიტორიაზეა.

საოკუპაციო რეჟიმს ვაჟა გაფრინდაშვილის გათავისუფლებისკენ მოუწოდა არაერთმა ქვეყანამ, მათ შორის, ლიეტუვის საგარეო საქმეთა მინისტრმა, ლინას ლინკევიჩუსმა და აშშ-ს მთავრობამ.