პრემიერ-მინისტრი გიორგი გახარია აცხადებს, რომ პროპორციულ საარჩევნო სისტემასთან დაკავშირებით პარლამენტმა უკვე მიიღო გადაწყვეტილება და მის გადაწყვეტილებას კითხვის ნიშნის ქვეშ ვერავინ ვერ დააყენებს. ამის შესახებ მან ამერიკელი კონგრესმენების კრიტიკულ წერილზე საუბრისას განაცხადა:

"ეს ხალხის მიერ არჩეული პარლამენტია და პარლამენტმა გადაწყვეტილება მიიღო. სხვა ყველაფერი არის პოლიტიკური პროცესი".

გახარიას თქმით, ისინი სტრატეგიული პარტნიორებისა და მეგობრების კრიტიკას სამუშაო რეჟიმში იღებენ და ამაში პრობლემას ვერ ხედავენ.

"არსებობს გარკვეული შეკითხვები ჩვენ ამ შეკითხვებს ვუპასუხებთ. ეს არის პოზიტიური თანამშრომლობის, პოზიტიური მეგობრობის ნაწილი".

მან კიდევ ერთხელ გაიმეორა, რომ აშშ-სა და საქართველოს შორის სტრატეგიული პარტნიორობის დონე, რომელიც დღეს გვაქვს, აქამდე არ გვქონია და ევროინტეგრაციის პროცესშიც მნიშვნელოვანი წინსვლაა:

"რაც უფრო მეტ შედეგებს ვაღწევთ, ჩვენი პარტნიორები მეტს ითხოვენ და მეტი მოლოდინები აქვთ. ეს ნორმალური და ეს მიუთითებს მხოლოდ და მხოლოდ პროგრესზე. რა თქმა უნდა, ჩვენ ღია ვართ ყველანაირი სახის დისკუსიაზე".

ამასთანავე გახარია ამბობს, რომ აქციის დაშლასთან დაკავშირებით ამერიკელ პარტნიორებს რეალურ და ობიექტურ ინფორმაციას მიაწვდიან.

"ჩვენ დარწმუნებული ვართ ყველა იმ ნაბიჯში, რომელიც იყო აქციების დროს განხორციელებული სამართალდამცავის სისტემის მიერ. გამოხატვის თავისუფლება არასოდეს ისე დაცული, ღია და ტრანსპარენტული არ ყოფილა, როგორც არის დღეს. ეს ფაქტია და ამას მე არ ვაფასებ მარტო", — განაცხადა პრემიერმა.

გუშინ, 16 დეკემბერს კონგრესმენებმა ადამ კინზინგერმა და ჯერალდ ე. კონოლმა საქართველოს პრემიერ-მინისტრს, გიორგი გახარიას წერილით მიმართეს. მათ პრემიერი პროპორციულ სისტემაზე გადასვლის დაპირების შეუსრულებლობის გამო გააკრიტიკეს. მათივე წერილში აღნიშნულია, რომ გასაპროტესტებლად ქუჩაში გამოსულ ხალხს "მოძალადე ბოროტმოქმედები დაუპირისპირეს".

საქართველოს საგარეო საქმეთა მინისტრის, დავით ზალკალიანის თქმით, ამერიკელი კონგრესმენების კრიტიკული განცხადებით, ქვეყნებს შორის ურთიერთობა არ კნინდება. მინისტრის განცხადებით, აუცილებელია, პარტნიორებს მიეწოდოთ ადეკვატური ინფორმაცია, ქვეყანაში მიმდინარე პროცესებთან დაკავშირებით.

გარდა ამისა, აშშ-ში საქართველოს ელჩი, დავით ბაქრაძე აღნიშნავს, რომ ვაშინგტონამდე წინააღმდეგობრივი გზავნილები ჩადის, თუმცა "ჩვენი პარტნიორები ყოველთვის იღებენ ობიექტურ ინფორმაციას ჩვენგან".