ევროკავშირის განცხადებით, საქართველოში უზენაესი სამოსამართლეთა შერჩევის პროცესი არ იყო გამჭვირვალე, რაც ხელს უშლიდა კანდიდატების დასახელებას რეალური დამსახურების მიხედვით. ასევე, ისინი მიანიშნებენ, რომ არ იყო გათვალისინებული ვენეციის კომისიის რეკომენდაციები. ამის შესახებ EU-ს საგარეო ურთიერთობების პრესსპიკერმა განაცხადა.

"არჩეული კანდიდატების ნაწილი საზოგადოებაში ნდობით არ სარგებლობს, რაც შერჩევის პროცესში აშკარა იყო. მიუხედავად იმისა, რომ პარლამენტში მიმდინარე გასაუბრებები გამჭვირვალედ მიმდინარეობდა, საჭირო იყო უფრო მეტი ძალისხმევა საბოლოო კენჭისყრამდე კანდიდატთა შერჩევის დასასაბუთებლად".

მათივე განცხადებით, იმისთვის, რომ სასამართლო სისტემისადმი საქართველოს მოქალაქეების ნდობა აღდგეს და ქვეყანა ევროკავშირის დღის წესრიგით განვითარდეს, საკვანძო მნიშვნელობა აქვს საქართველომ დაიცვას ეთიკისა და მიუკერძებლობის უმაღლესი სტანდარტები.

"აქედან გამომდინარე, ნებისმიერ შემდგომ დამტკიცებამდე საჭიროა შერჩევის პროცედურების გადასინჯვა იმისთვის, რომ სრულად იყოს გათვალისწინებული ვენეციის კომისიის რეკომენდაციები ისევე, როგორც ეუთოს დემოკრატიული ინსტიტუტებისა და ადამიანის უფლებების ოფისის (ODIHR) და სხვა ძირითადი დამკვირვებლების მიერ გამოვლენილი ხარვეზები".

მიუხედავად სამოქალაქო საზოგადოების, საერთაშორისო ორგანიზაციებისა და ოპოზიციის პროტესტისა ქართულმა ოცნებამ უზენაეს სასამართლოში უვადოდ 14 კანდიდატი დანიშნა. ისინი 20 კაციანი სიიდან იყვნენ შერჩეული. მომხდარს გამოეხმაურა აშშ-ის საელჩოც და განაცხადა, რომ სიაში მოხვდა კანდიდატთა ის ნაწილი, ვინც "მოსმენებისას ვერ შეძლო საკმარისად წარმოეჩინა იურიდიული ცოდნა ან ერთგულება მიუკერძოებლობისადმი".

უზენაესის კანდიდატების დამტკიცება პროტესტის ფონზე

12 დეკემბერს სამოქალაქო მოძრაობის აქტივისტებმა და პოლიტიკური პარტიის წარმომადგენლებმა პარლამენტის შესასვლელების პიკეტირება სცადეს, თუმცა დეპუტატები საკანონმდებლო ორგანოში მაინც შევიდნენ. აქციაზე პოლიციამ ჯამში 16 პირი დააკავა.

პარლამენტის უპარტიო დეპუტატი, ეკა ბესელია ამბობდა, რომ მოსამართლეთა არასასესიო კვირაში არჩევა პარლამენტის რეგლამენტს ეწინააღმდეგებოდა. ის რამდენიმე წუთის განმავლობაში კომიტეტის თავმჯდომარეს არ აძლევდა საშუალებას კანდიდატურები განეხილათ.

პროცესის ჩასაშლელად კენჭისყრის დაწყებამდე რამდენიმე წუთით ადრე პლენარულ სხდომათა დარბაზში გაურკვეველი ნივთიერება გაუშვეს, რამდენიმე ადამიანი ცუდად გახდა. ამ მიზეზით სხდომათა დარბაზი დაატოვებინეს დეპუტატებს და კენჭისყრამ რამდენიმე საათით გადაიწია. საქმეზე გამოძიება შსს-მ სისხლის სამართლის კოდექსის 117-ე მუხლით დაიწყო. ამ მუხლით ჯანმრთელობის განზრახ მძიმე დაზიანება მინიმუმ 3-წლიანი პატიმრობით ისჯება. ქართულმა ოცნების ერთ-ერთმა დეპუტატმა მომხდარი ტერორისტულ აქტად, დანარჩენებმა კი ქიმიურ თავდასხმად შეაფასეს. მომხდარზე პასუხისმგებლობა #სირცხვილიამ აიღო.

საბოლოოდ, კენჭისყრა მაინც ჩატარდა და ქართულმა ოცნებამ 14 მოსამართლე უზენაეს სასამართლოში უვადოდ დანიშნა.