ოქროს გლობუსი 2025-ის გამარჯვებულები სულ ცოტა ხნის წინ გამოვლინდნენ. ამერიკულ კინო და სატელევიზიო ინდუსტრიაში ერთ-ერთი ყველაზე პრესტიჟული დაჯილდოების რიგით 82-ე ცერემონია 5 იანვარს გაიმართა. წლევანდელი ცერემონიის ერთ-ერთი ყველაზე ღირსშესანიშნავი მომენტი კი დემი მურისთვის ჯილდოს გადაცემა და მსახიობის ემოციური სიტყვით გამოსვლა იყო.

62 წლის მსახიობმა თავის კარიერაში პირველად მიიღო ოქროს გლობუსი. ჯილდო მას ფილმ The Substance-ში მთავარი როლის შესრულებისთვის გადაეცა. საკუთარ სამადლობელ სიტყვაში კი მურმა ყურადღება გაამახვილა განვლილ გზაზე შეხვედრილ სირთულეებზე, უმთავრესად, თავდაჯერების ნაკლებობაზე.

"ნამდვილად არ ველოდი. გაოგნებული ვარ. 45 წელზე მეტია, ამ საქმით ვარ დაკავებული და ეს პირველი შემთხვევაა, როცა რაღაც მოვიგე, როგორც მსახიობმა", — განაცხადა დემი მურმა, — "30 წლის წინ, ერთმა პროდიუსერმა მითხრა, პოპკორნის მსახიობი ხარო. ამან მაშინ მაფიქრებინა, რომ ასეთ ჯილდოს არ ვიმსახურებდი. რომ შემეძლო მეთამაშა წარმატებულ და შემოსავლიან ფილმებში, მაგრამ დავიჯერე, რომ არ შეიძლებოდა აღიარება მომეპოვებინა.

"ეს განცდა დროთა განმავლობაში მჭამდა და ბოლოს იქამდე მივედი, რომ რამდენიმე წლის ვიფიქრე, მორჩა, იქნებ, საკუთარი თავი ამოვწურე-მეთქი. და ასეთ მძიმე პერიოდში გამოჩნდა ჩემს ცხოვრებაში ჯადოსნური, გაბედული, თამამი, არაორდინალური და სრულიად არანორმალური ფილმის, The Substance-ის, სცენარი. ამით სამყარომ მიმანიშნა, შენი საქმე არ დაგისრულებიაო. და ძალიან მადლიერი ვარ [რეჟისორ] კორალი ფარჟასი, რომ ამ პერსონაჟის შესრულება მანდო. მადლიერი ვარ მარგარეტ კუოლისა, ჩემი მეორე ნაწილისა, რომლის გარეშეც ამას ვერ გავუმკლავდებოდი. მადლიერი ვარ იმ ადამიანებისა, რომლებიც 30 წელზე მეტია, ჩემ გვერდით დგანან, განსაკუთრებით მათი, ვისაც ჩემი მაშინაც კი სჯეროდა, როცა თავად არ მჯეროდა საკუთარი თავის.

"ბოლოსკენ, გეტყვით ერთ რამეს, რასაც, ჩემი აზრით, ეს ფილმიც შეეხება: არის მომენტები, როცა ვფიქრობთ, რომ არ ვართ საკმარისად ჭკვიანი, ლამაზი, გამხდარი, წარმატებული ან, უბრალოდ, საკმარისი. ერთმა ქალმა მითხრა, გახსოვდეს, რომ საკმარისი ვერასდროს იქნები, მაგრამ შეგიძლია საკუთარი თავის ფასი იცოდე, საზომ ხელსაწყოს თუ გვერდზე გადადებო. და დღეს ამ ჯილდოთი საკუთარ სრულფასოვნებას აღვნიშნავ. აღვნიშნავ ჩემს მამოძრავებელ სიყვარულს, საყვარელი საქმის კეთების ნიჭსა და იმის შემხსენებელს, რომ ჩემი ადგილი აქაა".

The Substance-ის პრემიერა გასული წლის კანის კინოფესტივალზე შედგა, სადაც მას საუკეთესო სცენარისთვის ერგო ჯილდო. ოქროს გლობუსის ხუთგზის ნომინანტი ფილმის სცენარისტი, რეჟისორი და პროდიუსერი კორალი ფარჟაა. ნაწარმოების მთავარი გმირი მივიწყებული კინოვარსკვლავია, რომელიც ასაკის გამო პროდიუსერს დაკარგავს, მერე კი, გაახალგაზრდავების მიზნით, შავ ბაზარზე ნაშოვნ უცნობ ნივთიერებას მიიღებს, თუმცა, მის ამ ქმედებას მოულოდნელი შედეგები მოჰყვება.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...