5 იანვარს, მესტიის მუნიციპალიტეტის სოფელ ნაკრასთან ორ ტურისტს, სავარაუდოდ, საქართველოს მოქალაქეები თავს დაესხნენ. ორივე მათგანი რუსეთის მოქალაქეები არიან. ქალი პოლიციაში უკვე გამოიკითხა, კაცის ადგილსამყოფელი კი ამ დრომდე უცნობია. არ დასტურდება ინფორმაცია იმის შესახებ, რომ საქართველოს მოქალაქეებმა ქალი გააუპატიურეს.

მთის ამბების ინფორმაციით, რუსეთის მოქალაქე ვიქტორ სოლოვიევს ამ დრომდე ეძებს. პოლიცია ნაკრასა და ლახამულაში საცხოვრებელი სახლები გაჩხრიკა, მაგრამ მას ვერ მიაგნეს.

მეორე ტურისტი, ალინა (გვარი უცნობია) ბლოგერ ნიკოლაი ლევშიცის ტელეგრამის არხზე კომენტარებში თავდასხმის დეტალებს იხსენებს. მისი თქმით ის და მისი პარტნიორი თეთნულდისკენ შკოდას ავტომობილით მიდიოდნენ, როცა გათოვდა და გვირაბთან სურათების გადასაღებად გაჩერდნენ. ამ დროს მათთან თეთრი "სუბარუს" მარკის ავტომობილი გაჩერდა და ჰკითხეს, დახმარება ხომ არ უნდოდათ, შემდეგ გადაუსწრეს და კიდევ ერთხელ შეხვდნენ გზაზე, რასაც მოჰყვა კონფლიქტი და გასროლა.

"თეთნულდისკენ მივდიოდით, როცა გათოვდა. გვირაბთან გავჩერდით, თოვლისთვის რომ შეგვეხედა, ვიდეო გადავიღეთ. პირველად ჩვენთან ახლოს მოვიდნენ, გაჩერდნენ და იკითხეს, დახმარება ხომ არ გვჭირდებოდა. ვუთხარით არა, მადლობა, უბრალოდ ფოტოებს ვიღებთ-მეთქი და წავიდნენ. შემდეგ მათ გადავუსწარით. გზის პირას იდგნენ. გზაზე გაჭედილი მანქანა შეგვხვდა, ვიტიამ ისინი ბუქსირით ამოიყვანა. ამ მომენტში თეთრმა სუბარუმ ჩაგვიარა, ამჯერად აღარ გაჩერებულა.

როდესაც ვიტიამ შორიდან შეამჩნია, რომ ისინი შუა გზაზე იდგნენ, მთხოვა, სანივთე უჯრიდან დანა მიმეწოდებინა. შეჩერდა, გადავიდა და ჰკითხა, რა მოხდაო.

მათ ჰაერის ტუმბო სთხოვეს. ამოიღო და მისცა. შემდეგ რაღაც კონფლიქტი დაიწყო. ისინი ამბობდნენ, მობილურები მოგვეცით, ფოტოებს რატომ გვიღებდითო. შემოძვრა და ვიტიას ერთი ტელეფონი აიღო. მან (ვიქტორმა) მათ სთხოვა, რომ მე არ შემხებოდნენ. კიდევ შემოძვრა და მეორე ტელეფონი აიღო. შემდეგ მათ შორის დიალოგი დაიწყო, მხოლოდ ვიქტორის ხმა მესმოდა. ეუბნებოდა, რომ არ შეხებოდნენ. შემდეგ იყო ორი გასროლა, ვერ დავინახე რა მიმართულებით და ვერც ვიქტორს ვხედავდი. ჩემთან თავდამსხმელი პისტოლეტით მოვიდა, მომიშვირა და მობილურის მიცემა მომთხოვა, არც დამლოდებიან, ორივე თავდამსხმელი ჩვენს მანქანაში ჩასხდა და პირდაპირ სვლა გააგრძელეს, შემდეგ, უკან რომელიც იჯდა, მანქანიდან ჩამოვიდა. ჩვენ წინსვლა გავაგრძელეთ. შემდეგ სუბარუ მოგვიახლოვდა, რომელიც ჩვენი მანქანის საჭესთან იჯდა შემობრუნდა, გადავიდა და სუბარუში ჩაჯდა. 10 წუთით წავიდნენ, ამ დროს მე 112-ზე დავრეკე. მოვასწარი მეთქვა, რომ მესტიამდე დაახლოებით ერთი საათის გზა გვქონდა დარჩენილი, ჩვენი მანქანის ნომერი ვუთხარი და ყველაფერი ავუხსენი.

მანქანაში შიგნიდან ჩავიკეტე, ისინი დაბრუნდნენ და ფანჯრების ჩამსხვრევა დაიწყეს. მანქანა გავაღე. მითხრეს უკან გადავმჯდარიყავი, გადავჯექი და ჩუმად დავიძარით. ვთხოვდი გავეშვით, არ დავეხოცეთ. მან მითხრა, თქვენს დახოცვას არავინ აპირებსო. მივედით მაღლობამდე, რომელზე ასვლაც სურდათ. შკოდათი ვერ შეძლო, სუბარუ უკვე წინ იყო წასული. შემდეგ უკან დაიხია, ჩვენი მანქანიდან სუბარუში გადაჯდა და წავიდნენ. მაშინ მე მობილურის ამოღება შევძელი და კიდევ ერთხელ დავრეკე 112-ზე. ორი ჩამვლელი მანქანა გავაჩერე. შემდეგ მოვიდა პოლიცია. ეგრევე მოვიდა [პოლიციელების] პიკაპები ავტომატებით და ეს ყველაფერი გრძელდება მას შემდეგ", — წერს რუსი ტურისტი.

შინაგან საქმეთა სამინისტრო მომხდარს სისხლის სამართლის კოდექსის 179-ე და 236-ე მუხლებით იძიებს, რაც ყაჩაღობასა და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს. ნაპოვნია ორივე ავტომობილი.