საქართველოს მე-5 პრეზიდენტი, სალომე ზურაბიშვილი, მაკკეინის ინსტიტუტის კისინჯერის სტიპენდიატად დასახელდა.

"მაკკეინის ინსტიტუტმა არიზონას შტატის უნივერსიტეტში (ASU), საქართველოს პრეზიდენტი სალომე ზურაბიშვილი 2025 წლის კისინჯერის სტიპენდიანტად გამოაცხადა.

ზურაბიშვილი საქართველოს პრეზიდენტია 2018 წლიდან. ის იყო საქართველოს პირველი ქალი საგარეო საქმეთა მინისტრი, რომელმაც 2005 წელს მოახერხა რუსული სამხედრო ბაზების გაყვანის შესახებ მოლაპარაკებების წარმატებით დასრულება. 2016 წელს იგი ასევე აირჩიეს მაჟორიტარ დეპუტატად. პრეზიდენტობის პერიოდში ზურაბიშვილი აქტიურად იცავდა საქართველოს ევროპული კავშირისა (EU) და NATO-ს ინტეგრაციის გზას და მხარს უჭერდა დემოკრატიულ რეფორმებს. განსაკუთრებით აღსანიშნავია მისი წინააღმდეგობა ქართული ოცნების მთავრობის კრემლისეული "უცხოელი აგენტების კანონისა" და პარტიის ავტოკრატიული ტენდენციების მიმართ.

ზურაბიშვილმა 2024 წლის ოქტომბრის საპარლამენტო არჩევნები არალეგიტიმურად გამოაცხადა ქართული ოცნების მიერ განხორციელებული საარჩევნო ზეწოლისა და მანიპულაციების გამო და მხარი დაუჭირა ოპოზიციურ პარტიებს, რომლებმაც უარი თქვეს მანდატებზე. მას შემდეგ, რაც ქართულმა ოცნებამ საქართველოს ევროკავშირის წევრობის პროცესის შეჩერების შესახებ გამოაცხადა, ქვეყნის მასშტაბით დაიწყო ფართომასშტაბიანი საპროტესტო აქციები. პროტესტებს ძალადობა და დაკავებები მოჰყვა. ზურაბიშვილმა გამოხატა მხარდაჭერა დემოკრატიული მოძრაობისადმი და შეუერთდა საპროტესტო მოძრაობას.

კონსტიტუციური ცვლილებების თანახმად, საქართველოს შემდეგი პრეზიდენტი 2024 წელს უნდა აერჩია საარჩევნო კოლეგიას, რომელიც ადგილობრივი ოფიციალური პირებისა და პარლამენტისგან შედგებოდა. თუმცა, 14 დეკემბერს პარლამენტმა, რომელიც არალეგიტიმურად იყო შეკრებილი საარჩევნო პროცესის გაყალბების საქმეების გადაუწყვეტლობისა და პრეზიდენტის თანხმობის გარეშე, აირჩია ახალი პრეზიდენტი, ფეხბურთელი მიხეილ ყაველაშვილი, რომელიც ცნობილია თავისი ანტიდასავლური რიტორიკით. მან თანამდებობა 29 დეკემბერს დაიკავა. დემოკრატიის აქტივისტები ამ პროცესს უკანონოდ მიიჩნევენ და პროტესტს აგრძელებენ.

ზურაბიშვილი უარს ამბობს თანამდებობის დატოვებაზე და აღწერს თავის ქვეყანაზე განხორციელებულ უკანონო ძალაუფლების ხელში ჩაგდებას. როგორც მაკკეინი და კისინჯერი, ის წარმოადგენს პრინციპული პოლიტიკოსისა და თავის ქვეყანის დემოკრატიული ღირებულებების დამცველის მაგალითს. სენატორი მაკკეინი იდგა ქართველების გვერდით რუსეთის მიერ საქართველოში 2008 წელს განხორციელებული აგრესიის დროს. მაკკეინის ინსტიტუტის კისინჯერის სტიპენდიის მფლობელის სტატუსით, ზურაბიშვილი გააგრძელებს დემოკრატიის პრინციპული და სტრატეგიული ლიდერობის ტრადიციას მსოფლიოს ერთ-ერთ ყველაზე მნიშვნელოვან დემოკრატიულ ფრონტზე", — ვკითხულობთ მაკკეინის ინსტიტუტის განცხადებაში.