თბილისის მერს და ყოფილ ფეხბურთელს, კახა კალაძეს და ოცნების მიერ არჩეულ პრეზიდენტს, ასევე ყოფილ ფეხბურთელს — მიხეილ ყაველაშვილს შესთავაზეს, რომ 2025 წელს საქართველოს ფეხბურთის ნაკრებმა რუსეთის ნაკრებთან ითამაშოს, — ამის შესახებ რუსული მედია წერს.

უფრო ზუსტად — სსრკ-ს ნაკრებისა და მოსკოვის სპარტაკის ლეგენდარულმა მეკარემ ანზორ კავაზაშვილმა RB Sport-თან ინტერვიუში განაცხადა, რომ კარგი იქნებოდა მომავალ წელს რუსეთისა და საქართველოს ნაკრებებს შორის ამხანაგური მატჩის მოწყობა.

მისი თქმით, მან წერილი უკვე გაუგზავნა თბილისის მერს კახა კალაძეს და ქვეყნის პრეზიდენტს მიხეილ ყაველაშვილს.

"გადადგით მშვიდობიანი და აუცილებელი ნაბიჯი კეთილმეზობლური ურთიერთობების გასაძლიერებლად. ჩვენ ერთიანები ვართ მე-18 საუკუნის დასაწყისიდან, როდესაც ერთობლივად გადავწყვიტეთ ტერიტორიული საკითხები და გავაფართოვეთ საქართველოს საზღვრები!" — განაცხადა სპარტაკისა და ტორპედოს ყოფილმა მეკარემ ინტერვიუში.