"მივიღე გადაწყვეტილება, რომ არსებული პირობები მნიშვნელოვანი და ინკლუზიური დისკუსიებისთვის ხელსაყრელი არ არის", — ამის შესახებ ეუთო-ს საპარლამენტო ასამბლეის პრეზიდენტის, პია კაუმას წერილშია ნათქვამი, რომელსაც ის საქართველოს საგარეო საქმეთა მინისტრს, მაკა ბოჭორიშვილს უგზავნის. მისი თქმით, მიიღეს გადაწყვეტილება, რომ საქართველოში ვიზიტისთვის უფრო ხელსაყრელი დრო შეირჩევა, როცა კონსტრუქციული ჩართულობისთვის პირობები უკეთესი იქნება.

წერილში ნათქვამია, რომ "საქართველოს საარჩევნო პროცესებს ეუთო-ს წინაშე აღებულ ვალდებულებებთან და საერთაშორისო დემოკრატიულ სტანდარტებთან შესაბამისობაში მოყვანის მიზნით წინ სამუშაო აქვს".

"საქართველოში დაგეგმილ ვიზიტთან დაკავშირებით ჩემი წინა მიმოწერის შემდეგ, ბოდიშის მოხდით უნდა გაცნობოთ, რომ ვიზიტი, როგორც ადრე იყო დაგეგმილი, 8-10 იანვარს ვერ შედგება. ეს გადაწყვეტილება არსებული გარემოებების გულდასმით განხილვის შემდეგ იქნა მიღებული. როგორც 26 ოქტომბრის საპარლამენტო არჩევნების შესახებ ოდირის საარჩევნო სადამკვირვებლო მისიის საბოლოო დასკვნაშია ხაზგასმული და როგორც გუშინ, პრემიერმინისტრთან კონსტრუქციულად იქნა განხილული, საქართველოს საარჩევნო პროცესებს ეუთო-ს წინაშე აღებულ ვალდებულებებთან და საერთაშორისო დემოკრატიულ სტანდარტებთან შესაბამისობაში მოყვანის მიზნით წინ სამუშაო აქვს. ხარვეზების აღმოსაფხვრელად ანგარიშში მოცემული დასკვნები და რეკომენდაციები მნიშვნელოვანი რჩება და მათი განხორციელების მიზნით ჩემს მტკიცე მხარდაჭერას კიდევ ერთხელ ვიმეორებ", — წერს პია კაუმა.

ეუთო-ს საპარლამენტო ასამბლეის პრეზიდენტის, პია კაუმას საქართველოში ვიზიტის შესახებ 5 იანვარს გახდა ცნობილი. ფაქტს უარყოფითად გამოეხმაურა: საქართველოს მე-5 პრეზიდენტი, სალომე ზურაბიშვილი, ჰელსინკის კომისიის თავმჯდომარე, ჯო უილსონი, ევროპარლამენტარები – რიჰარდს კოლსი და რასა იუკნევიჩიენე, გერმანიის პარლამენტის საგარეო ურთიერთობათა კომიტეტის თავმჯდომარე, მიხაილ როთი და პროევროპული ოპოზიციის ლიდერები.

"ოცნების" ხელისუფლების წარმომადგენლები კი ამტკიცებდნენ, რომ პია კაუმას საქართველოში ვიზიტი იმის დასტური იქნებოდა, რომ 26 ოქტომბრის საპარლამენტო არჩევნები შედგა.

დღეს, 6 იანვარს, ცნობილი გახდა, რომ ეუთო-ს საპარლამენტო ასამბლეის პრეზიდენტმა, პია კაუმამ საქართველოში ვიზიტი გადადო. ამის შესახებ მან X-ზე დაწერა.