რუსულმა სასამართლომ ე.წ "უცხოეთის აგენტები" წელიწად-ნახევრის განმავლობაში 25.8 მილიონი რუბლით დააჯარიმა, ამის შესახებ საინფორმაციო სააგენტო ტასი წერს.

სასამართლოების მონაცემებზე დაყრდნობით, 2023 წლის დასაწყისიდან 2024 წლის შუამდე 620 ჯარიმა გამოიწერა, რომელთაგანაც 471 ფიზიკურ პირებს შეეხო.

დაჯარიმების ტემპები იზრდება. მთლიანი 2023 წლის განმავლობაში, სასამართლოებმა 368 ჯარიმა გამოსცეს "უცხოეთის აგენტების" მიერ საქმიანობის წესრიგის დარღვევისთვის, რაც ჯამურად 15,2 მილიონ რუბლს უტოლდება. 2024 წლის პირველ ნახევარში გამოწერილი 252 ჯარიმის ფულადი ჯამი კი 10,6 მილიონს შეადგენს.

"უცხოეთის აგენტებმა" ჯარიმების მხოლოდ მეექვსედი ნაწილი, 4 მილიონ რუბლზე ოდნავ ნაკლები, გადაიხადეს.

2022 წლიდან მოქმედ "უცხოეთის აგენტების რეესტრში" 906 ორგანიზაცია და ფიზიკური პირია შეყვანილი, ახალი სახელები კი სიას, ფაქტობრივად, ყოველკვირეულად ემატება.

კანონი "უცხოეთის აგენტების" შესახებ რუსეთში 2012 წელს გამოჩნდა და უფლება მისცა იუსტიციის სამინისტროს, არაკომერციული ორგანიზაციები, რომლებიც უცხოეთიდან ფინანსდებოდნენ, "უცხოეთის აგენტებად" გამოეცხადებინა. საბოლოოდ, "უცხოეთის აგენტებად" გამოცხადდნენ ის მედიასაშუალებები და ფიზიკური პირებიც, რომლებიც უცხოეთიდან არ ფინანსდებოდნენ, თუმცა "უცხოურ გავლენას განიცდიდნენ".