ანდრო ჭიჭინაძის ადვოკატი, თორნიკე მიგინეიშვილი სოციალური ქსელში წერს, რომ პროკურატურა 16 იანვარს დაგეგმილი ანდრო ჭიჭინაძის პროცესის 12 მარტისთვის გადადებას ითხოვს. მისი თქმით, ამის მიზანია, რომ უკანონოდ დაპატიმრებულ პირთა საქმის საჯარო განხილვა დროულად არ დაიწყოს და არ გამოჩნდეს გამოძიების უსაფუძვლობა.

მისივე თქმით, ანდრო ჭიჭინაძის დაკავებიდან 1 თვეზე მეტია გასული (გამოძიების დაწყებიდან კი უფრო მეტი), გამოძიების ორგანო კი ამბობს რომ მტკიცებულებების მოსაპოვებლად დრო საკმარისი არ არის.

"საზოგადოების მაღალი ინტერესიდან გამომდინარე ადვოკატების ჯგუფის სახელით გაწვდით ინფორმაციას ანდრო ჭიჭინაძის საქმესთან დაკავშირებით.

1. პროკურატურა ითხოვს 16 იანვრის პროცესის გადადებას 12 მარტისთვის.

მიზანი არის უკანონოდ დაპატიმრებულ პირთა საქმის საჯარო განხილვა არ დაიწყოს დროულად და არ გამოჩნდეს გამოძიების უსაფუძვლობა.

2. შუამდგომლობის დასაბუთება ეწინააღმდეგება კანონის მოთხოვნას! ისეთივე დაუსაბუთებელია როგორიც იყო ბრალის დადგენილება და პატიმრობის გამოყენების მოთხოვნა.

საგამოძიებო ორგანო დღემდე ვერ უთითებს კონკრეტულ ფაქტებს, რომლებიც წარდგენილ ბრალდებას დაადასტურებს. ვერ უთითებს, რადგან არ არსებობს ბუნებაში რაიმე დანაშაულებრივი ფაქტი.

3. საქმეები გაერთიანდა ერთ წარმოებად და ეს გადაწყვეტილებაც უკანონოა.

დაპატიმრებული პირები ერთმანეთს არ იცნობენ, მაშინ როცა ბრალად წარდგენილი აქვთ ჯგუფურ ძალადობაში მონაწილეობა.

4. გამოძიებამ 11 პირის სისხლის სამართლის საქმე ხელოვნურად გააერთიანა.

ამით პროკურატურა ქმნის ხელოვნურ სურათს რომ საქმე მოცულობითია (დიდია) და სურს მუდმივად ამ არგუმენტით მოითხოვოს პროცესის გადადება.

5. ანდრო ჭიჭინაძის დაკავებიდან 1 თვეზე მეტია გასული (გამოძიების დაწყებიდან კი უფრო მეტი), გამოძიების ორგანო კი ამბობს რომ მტკიცებულებების მოსაპოვებლად დრო საკმარისი არ არის.

დაცვის მხარის პოზიციას შუამდგომლობის შესახებ ხვალ წარვადგენთ.

ფოტოზე კი ხედავთ პროკურატურის მხრიდან დანახულ "ნაყოფიერი თვის" შეფასებას. (აბზაცი შუამდგომლობიდან)", — წერს ადვოკატი.

მსახიობი ანდრო ჭიჭინაძე საკუთარ სახლში პოლიციამ 5 დეკემბერს დააკავა. მას ბრალად სისხლის სამართლის კოდექსის 225-ე მუხლის მეორე ნაწილით წარედგინა, რაც ჯგუფურ ძალადობაში მონაწილეობას გულისხმობს. მუხლი 4-დან 6 წლამდე თავისუფლების აღკვეთას ითვალისწინებს.