1-ელ იანვარს უკრაინის გავლით რუსული გაზის მიწოდება შეწყდა.

კიევმა ამ მოვლენას "ისტორიული დღე" უწოდა, თუმცა მეზობელ მოლდოვაში ამ გადაწყვეტილებას ენერგეტიკული კრიზისი შეიძლება მოჰყვეს.

კრიზისი დნესტრისპირეთში

BBC-ის ცნობით, სეპარატისტულ რეგიონ დნესტრისპირეთში, რომელიც მოლდოვას აღმოსავლეთით მდებარეობს, გუშინდელს შემდეგ გათბობით მხოლოდ საავადმყოფოები და კრიტიკული ინსფრასტრუქტურაა უზრუნველყოფილი.

"ცხელი წყალი მხოლოდ 2 საათამდე მოდიოდა — ახლა გათიშულია და გამათბობლებიც სულ ოდნავ თბება, გაზი ჯერ ისევ გვაქვს, თუმცა წნევა ძალიან დაბალია — მოგვეწოდება ის, რაც მილებში შემორჩა", — განუცხადა ბრიტანულ საზოგადოებრივ მაუწყებელს წყარომ.

დნესტრისპირეთის ქალაქების მაღალჩინოსნები "გათბობის პუნქტების" გახსნას ცდილობენ და ცხელი ხაზიც კი შეიქმნა შეშის მოპოვებაში დასახმარებლად. ოჯახებს მოუწოდეს, შეგროვდნენ ერთ ოთახში და ფანჯრებსა და კარებში სივრცეები, საიდანაც შეიძლება ცივი ჰაერი შემოვიდეს, ამოავსონ.

ახალი წლის პირველი დღე თვითგამოცხადებულ რესპუბლიკაში მზიანი იყო, თუმცა ღამით ტემპერატურა 0 გრადუსს ჩამოსცდა.

"ბინაში ახლა გრილა და ჩვენ არ ვიცით, როგორ ყინვას მოიტანს იანვარი", — აცხადებს ადგილობრივი.

ელექტროენერგიის მიწოდების პრობლემები

ელექტროენერგია ჯერჯერობით ხელმისაწვდომია, თუმცა დნესტრისპირეთის მთავარი ელექტროსადგური კურჩუგანში უკვე გაზის ნაცვლად ქვანახშირით ფუნქციონირებს და ასე მხოლოდ 50 დღის განმავლობაში შეიძლება გაგრძელდეს.

ეს პრობლემაა არამხოლოდ დნესტრისპირეთისთვის, არამედ დანარჩენი მოლდოვისთვისაც, რომელიც ელექტროენერგიის 80%-ს კურჩუგანიდან იღებს.

მოლდოვის რესპუბლიკის ხელისუფლების განცხადებით, ქვეყანას არსებული გაზის მარაგები გაზაფხულამდე ეყოფა, შემდეგ კი ელექტროენერგიის შეძენას ევროპიდან დაიწყებს, თუმცა ეს ხარჯების გიგანტურ ზრდას ნიშნავს.

გასულ თვეში ქვეყანაში საგანგებო მდგომარეობა გამოცხადდა და ბიზნესებსა და მოქალაქეებს მოუწოდეს, ელექტროენერგიის მოხმარება შეემცირებინათ.

გაზის ტრანზიტის მკვეთრი შეჩერება პრობლემებს უქმნის სლოვაკეთსა და უნგრეთსაც — ქვეყნებს, რომელთა ხელისუფლებებიც მოსკოვის მიმართ სიმპათიებით გამოირჩევიან.