ვიცეპრემიერმა და ინფრასტრუქტურის მინისტრმა მაია ცქიტიშვილმა ოპოზიციის მიერ ინიცირებულ ე.წ. გერმანულ საარჩევნო მოდელზე თქვა, რომ პარლამენტარებმა ყველაზე უკეთ იციან კონსტიტუცია.

"აქცენტის გაკეთება, რომ ეუთო-ში ან რომელიმე საერთაშორისო ექსპერტი უკეთ კითხულობდეს ჩვენს კონსტიტუციას, ალბათ, უკვე არ არის მთლად საფუძვლიანი არგუმენტი",— თქვა ცქიტიშვილმა.

მინისტრი იზიარებს თანაგუნდელების არგუმენტს, რომ "ოპოზიციის წარდგენილი გერმანული მოდელი არ შეესაბამება ჩვენს კონსტიტუციას".

დღეს, 3 დეკემბერს ცნობილი გახდა, რომ სახალხო დამცველი ნინო ლომჯარია ეუთო/ოდირს ოპოზოციის შემუშავებული საარჩევნო სისტემის კანონპროექტის მოდელს გაუგზავნის. სახალხო დამცველის თქმით, ეუთო/ოდირი მოთხოვნის შესაბამისად, კანონპროექტს პარლამენტში ოფიციალურად დარეგისტრირების შემდეგ გაგზავნის.

3 დეკემბერს გამართულ ერთობლივ პრესკონფერენციაზე გაერთიანებულმა ოპოზიციამ განაცხადა, რომ გერმანულ მოდელზე დაყრდნობით შემუშავებულ საარჩევნო სისტემის ქართული მოდელის კანონპროექტს სახალხო დამცველს გადაუგზავნის. სწორედ სახალხო დამცველს შეუძლია მისი მექანიზმის გამოყენებით ეუთო/ოდირს კანონპროექტის შეფასებისათვის მიმართოს.

გაერთიანებულმა ოპოზიციამ მმართველ პარტიას საარჩევნო სისტემის გერმანული მოდელზე გადასვლა მას შემდეგ შესთავაზა, რაც პარლამენტმა 2020 წლისათვის სრულად პროპორციულ სისტემაზე გადასვლის კანონპროექტი ჩააგდო. როგორც ოპოზიციისა და არასამთავრობო ორგანიზაციების წარმომადგენლები აცხადებენ, გერმანული მოდელის შემოღება საკონსტიტუციო ცვლილებებს არ საჭიროებს. საპირისპირო ამტკიცებს მმართველი გუნდი, მათი აზრით გერმანული მოდელი კონსტიტუციას არ შეესაბამება.