იუსტიციის უმაღლესი საბჭოს არამოსამართლე წევრი, ანა დოლიძე ამბობს, რომ ქართული ოცნება აპირებს შექმნილი პოლიტიკური დაძაბულობა გამოიყენოს და მოსამართლეთა სია "გააპაროს". მისი თქმით, ყველა კანონიერ გზას გამოიყენებს, რომ უზენაესის კანდიდატების სია პარლამენტში ჩავარდეს.

"დაუშვებელია ერთი კანდიდატის შეშვებაც კი უზენაეს სასამართლოში, არ აქვს მნიშვნელობა ამ კანდიდატების პროფილს, იმიტომ, რომ მთავარი, რაც ამ სიის შემადგენლობას აერთიანებს არის ის, რომ არცერთ კანდიდატს, არასდროს თავის პოზიციაში, არ ამოუღია ხმა სისტემის წინააღმდეგ. ეს კანდიდატები ყველანი არიან კომფორტულნი, ქართული ოცნების, ბიძინა ივანიშვილის და ამ კლანისთვის, რომელიც სასამართლო ხელისუფლებას მართავს", — თქვა ანა დოლიძემ პრესკონფერენციაზე.

ანა დოლიძემ სამოქალაქო საზოგადოებას, სტუდენტებს, ადვოკატებსა და იურისტებს მოუწოდა, რომ ამ საკითხის გარშემო მაქსიმალურად მობილიზდეს და პარლამენტის წევრები წნეხის ქვეშ მოაქციონ.

იმისთვის, რომ ხელი შეუშალონ მოსამართლეების ამ სიის დამტკიცებად, სასესიო კვირაში სამოქალაქო საზოგადოებასა და ოპოზიციურ სპექტრს პარლამენტის პიკეტირება აქვს დაგეგმილი.

უზენაესის მოსამართლეთა კონკურსი

2018 წელს პარლამენტისთვის დასამტკიცებლად წარდგენილ სიაში მოსამართლეობის 10 კანდიდატი იყო. კანდიდატების 10-კაციან სიას პოლიტიკური დაპირისპირება მოჰყვა როგორც საპარლამენტო უმრავლესობაში, ისე ოპოზიციასა და არასამთავრობო სექტორში. კრიტიკა ორ ძირითად საკითხს ეხებოდა:

• კრიტერიუმებისა და პროცედურების გარეშე შერჩეული 10 კანდიდატი;
• ე.წ. ჩინჩალაძე-მურუსიძის კლანის გაძლიერების საფრთხე.

უმრავლესობის დეპუტატებმა, მათ შორის ეკა ბესელიამ, გედევან ფოფხაძემ, ლევან გოგიჩაიშვილმა პროტესტის ნიშნად ქართული ოცნებაც დატოვეს. ბესელია აცხადებდა, რომ ამ სიის დამტკიცებას ქართული ოცნება და პარლამენტის თავმჯდომარე, ირაკლი კობახიძე ლობირებდა.

იუსტიციის საბჭომ სია პარლამენტიდან გამოითხოვა. ქართულმა ოცნებამ კი უზენაესის მოსამართლეთა შერჩევისა და წარდგენის პროცედურების კანონპროექტზე დაიწყო მუშაობა. კანონი პარლამენტმა პირველ მაისს დაამტკიცა. ქართული ოცნების კანონპროექტს მხარი არ დაუჭირეს პარტიიდან წასულმა დეპუტატებმა და საპარლამენტო ოპოზიციამ. ისინი კანონპროექტის მესამე მოსმენიდან მეორე მოსმენაზე დაბრუნებას მოითხოვდნენ. მათი პოზიციით, ქართულმა ოცნებამ არ გაითვალისწინა ვენეციის კომისიისა და სხვა საერთაშორისო ორგანიზაციების რეკომენდაციები და ე.წ. კლანს საშუალება მისცა "უზენაეს სასამართლოშიც გაძლიერებულიყო".

იუსტიციის უმაღლესმა საბჭომ პარლამენტისთვის წარსადგენი მოსამართლეების 20-კაციანი სია 4 სექტემბერს დაამტკიცა. ამ სიაში 5 ის მოსამართლეა, რომელიც პარლამენტში აქამდე წარდგენილ 10-კაციან სიაში იყო: გიორგი მიქაუტაძე; ნინო ქადაგიძე; პაატა სილაგაძე; მერაბ გაბინაშვილი; თამარ ალანია. იურიდიულ საკითხთა კომიტეტზე მოსამართლეობის კანდიდატებს მწვავე გასაუბრებები ჰქონდათ, ეჭვქეშ დადგა ზოგიერთი მათგანის კვალიფიკაცია და დიპლომიც კი. იუსტიციის უმაღლესი საბჭოს არამოსამართლე წევრმა, ნაზი ჯანეზაშვილმა დეპუტატებს 10 მიზეზი წარუდგინა, რის გამოც სია არ უნდა დამტკიცდეს.

8 ნოემბერს პარლამენტის იურიდიულ საკითხთა კომიტეტმა უზენაესი სასამართლოს მოსამართლეობის ოცივე კანდიდატის მოსმენა დაასრულა. პლენარულ სხდომაზე არჩევანი დეპუტატებზე იქნება, რომლებმაც კანდიდატებს მხარი უნდა დაუჭირონ.