არასამთავრობოები მმართველი ძალის პარლამენტში საკონსტიტუციო უმრავლესობით შესაძლო შესვლას ეხმაურებიან და აცხადებენ, რომ აღნიშნული ქვეყანაში დემოკრატიული პროცესების წარმართვას დააზიანებს.

როგორც საფარის ხელმძღვანელი, ბაია პატარაია აცხადებს, არჩევნების მეორე ტურში მოსახლეობამ ოპოზიციური კანდიდატების მხარდაჭერისას არა პარტიული დაპირისპირების, არამედ საპარლამენტო მოწყობისა და ქვეყნის ინტერესებიდან გამომდინარე იხელმძღვანელოს:

"უნდა გვესმოდეს, რომ საქართველომ რამდენჯერმე გამოიარა ერთპარტიული საპარლამენტო სისტემა და არც ერთხელ ეს კარგად არ დამთავრებულა არც საქართველოსთვის და არც თვითონ უშუალოდ პარტიისთვის. ამიტომ მნიშვნელოვანია, რომ ჩვენ ისევ არ გავიმეოროთ ის შეცდომა".

საკითხს ეხმაურება ასევე ადამიანის უფლებებისა და არჩევნების საკითხებში კონსულტანტი თამარ გურჩიანიც. ის ამბობს, რომ აუცილებელია ამომრჩეველმა არჩევნების მეორე ტურში მონაწილეობა მიიღოს და მხარი ოპოზიციურ პარტიებს დაუჭიროს:

"ძალიან დიდ საფრთხეს ვხედავთ იმაში, რომ კონსტიტუციური უმრავლესობა იქნება და ეს უმრავლესობა პირველ რიგში რასაც შეცვლის, იქნება კონსტიტუცია და ამით აბსოლუტურად ყველა დაზარალდება".