რევაზ არველაძის მსგავსად, პარლამენტში არც მერაბ ქვარაია შეუშვეს. მან პარლამენტის მიმდებარე ტერიტორია ხმაურის ფონზე დატოვა.

"მონა, ვირთხა, სამარცხვინო" — სკანდირებდნენ აქტივისტები, როცა დეპუტატი ტერიტორიას ტოვებდა, ქვარაიამ კი აქციის მონაწილეებს უთხრა, რომ სამარცხვინოები ისინი არიან.

მცირე დაპირისპირება მოხდა პოლიციასა და პარტია ახალი საქართველოს ლიდერ გიორგი ვაშაძეს შორისაც, როდესაც ვაშაძემ ქვარაიას უყვირა. ვაშაძე ქვარაიას უხსნიდა, რომ ის ხალხს აღიზიანებდა და ტერიტორია უნდა დაეტოვებინა, მოსმენის შემდეგ ქვარაიამ თქვა რომ ახლა ის იტყოდა სათქმელს, რაზეც ვაშაძემ იყვირა: "შენ რა უნდა მოგისმინო, ხმა ახლა".

ამის შემდეგ პოლიციამ ვაშაძის გამოყვანა სცადა, რაც პოლიტიკოსმა გააპროტესტა. ამას მცირედი ფიზიკური და სიტყვიერი დაპირისპირება მოჰყვა, თუმცა, ქვარაიას წასვლის შემდეგ სიტუაცია დაწყნარდა.

პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და ჩააწყეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.

ამავე თემაზე: