გვიყვარხარ — ამ შეძახილით მრევლმა სამების ტაძრიდან პატრიარქი ილია მეორე გააცილა. მოქალაქეები მანქანისკენ მიმავალ პატრიარქს ტაშს უკრავდნენ. საკვირაო წირვის პარალელურად სამების საკათედრო ტაძრის ეზოში ილია მეორის მხარდამჭერი აქცია მიმდინარეობდა.

მრევლის შეძახილების ვიდეოს ტელეკომპანია ფორმულა ავრცელებს:

დღეს, 3 ნოემბერს, სინოდის სხდომიდან მესამე დღეს საქართველოს პატრიარქმა, ილია მეორემ ქადაგებაზე უარი თქვა. მან მრევლს მხოლოდ რამდენიმე წინადადებით მიმართა.

"დღეს მე ქადაგება არ მექნება, შეგონება მექნება... გაუფრთხილდით სამშობლოსა და ეკლესიას, ამაშია ქართველი ერის ძალა... მადლობელი ვარ თანადგომისათვის, თანადგომა გამოიჩინეს სხვა რელიგიების წარმომადგენლებმაც, გაიხარეთ", — თქვა ილია მეორემ და გვარები დალოცა.

31 ოქტომბერს გამართული სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი".

მეუფე პეტრემ განმარტა, რომ სიტყვა "პიდარასტიაში" "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.