ლატვიამ ქართული წარმოშობის რუს მომღერალს, გრიგორი ლეპსს ქვეყანაში შესვლა აუკრძალა. ამის შესახებ ლატვიის საგარეო საქმეთა მინისტრმა, ედგარ რინკევიჩმა ტვიტერზე დაწერა. მომღერალს 2020 წელს რიგაში კონცერტი ჰქონდა დანიშნული. ლეპსს ორგანიზებულ დანაშაულთან კავშირში სდებენ ბრალს.

მიმდინარე წლის მაისში ლეპსს ლიტვაში შესვლა აუკრძალეს. მაშინ საგარეო საქმეთა მინისტრის მოადგილემ, დარიუს სკუსიავიჩუსმა ჟურნალისტებს უთხრა, რომ გადაწყვეტილება იმის საფუძველზე მიიღეს, რომ 2013 წელს აშშ-მ მომღერალი სანქცირებულთა სიაში შეიყვანა. აშშ ლეპსს რუსეთის დანაშაულებრივ ჯგუფთან კავშირს ედავება.

თვითონ ლეპსი კრიმინალთან რაიმე კავშირს უარყოფს. მომღერალი რუსეთის პრეზიდენტი, ვლადიმერ პუტინის მხარდამჭერია. 2018 წელს გრიგორი ლეპსმა მომღერალ ქეთა თოფურიასთან და რუსული ესტრადის სხვა წარმომადგენლებთან ერთად პუტინის საარჩევნო კლიპში იმღერეს.