დიდი ბრიტანეთის უზენაესმა სასამართლომ დაადგინა, რომ პრემიერ-მინისტრმა, ბორის ჯონსონმა პარლამენტის მუშაობა უკანონოდ შეაჩერა. როგორც ბრიტანული მედია წერს, სასამართლომ ისტორიული გადაწყვეტილება მიიღო და, ფაქტობრივად, პრემიერი ძალაუფლების ბოროტად გამოყენებაში დაადანაშაულა.

უზენაესი სასამართლომ წარმომადგენელმა, ლედი ჰეილიმ გადაწყვეტილების გამოცხადებისას განაცხადა, რომ მთავრობამ დასაბუთებული არგუმენტები ვერ წარადგინა თუ რისთვის სჭირდებოდა ბრექსიტამდე რამდენიმე კვირით ადრე პარლამენტის მუშაობის ხუთი კვირით შეჩერება. ამიტომაც 11 მოსამართლისგან შედგენილმა კოლეგიამ გადაწყვიტა, რომ პროროგაცია უკანონო.

დიდმა ბრიტანეთმა ევროკავშირი 31 ოქტომბერს უნდა დატოვოს. პარლამენტმა მუშაობა 9 სექტემბრიდან 14 ოქტომბრამდე შეაჩერა. ოპოზიციაში ამბობდნენ, რომ ჯონსონი ცდილობს, დეპუტატები პროცესში არ ჩართოს, რათა ქვეყანამ ალიანსი შეთანხმების გარეშე დატოვოს. შეთანხმების გარეშე ევროკავშირიდან გამოსვლას ეწინააღმდეგებიან როგორც ჯონსონის თანაპარტიელები, ისე ოპოზიციონერები. სწორედ ამიტომ პარლამენტმა მიიღო კანონი, რომლითაც ევროკავშირიდან შეთანხმების გარეშე გამოსვლა იკრძალება.

ამჟამად ბორის ჯონსონი ნიუ-იორკში გაეროს გენერალური ასამბლეის სხდომაზე იმყოფება. ჟურნალისტების კითხვაზე სასამართლოში წაგების შემთხვევაში გადადგება თუ არა პრემიერის თანამდებობიდან, ჯონსონმა უპასუხა, რომ პატივს სცემს კანონს და გადაწყვეტილებას შეისწავლის.

უზენაესი სასამართლოს გადაწყვეტილებით, პარლამენტის მუშაობის აღდგენა თემთა პალატის სპიკერისა და ლორდთა პალატის გადასაწყვეტია. სპიკერმა, ჯონ ბერკოუმ ჟურნალისტებს უთხრა, რომ საპარლამენტო პარტიების ლიდერებთან კონსულტაციებს დაიწყებს.

მთავარი ოპოზიცური პარტიის, ლეიბორისტული პარტიის ლიდერი, ჯერემი ჯორბინი აცხადებს, რომ პარლამენტის დაუყოვნებლივ მოწვევას მოითხოვს, რათა მთავრობისგან პასუხი მოითხოვონ. მანვე დაამატა, რომ ბრიტანეთის ისტორიაში ჯონსონი ყველაზე ხანმოკლე პრემიერი იქნება.