უზენაესი სასამართლოს მოსამართლეობის კანდიდატი მერაბ გაბინაშვილი ამტკიცებს, რომ საქართველოში სასამართლოს თავისუფლების ხარისხი "საშუალო ევროპულ და მათ შორის ევროკავშირის ქვეყნებს" უტოლდება. მეტიც, ის ფიქრობს, რომ "ბევრ ქვეყანაზე წინ ვდგავართ" და არგუმენტად საქართველოში სასამართლოსადმი ნდობის მაჩვენებელს ასახელებს.

ნაციონალური მოძრაობის დეპუტატის, რომან გოცირიძის კითხვაზე, არის თუ არა ქვეყანაში სასამართლო დამოუკიდებელი, ის პასუხობს:

"სასამართლო სისტემის თავისუფლება და დამოუკიდებლობა გაზომვადი ხარისხია, აბსოლუტური სუბსტანცია არ არის. ვერასოდეს ვერ იქნება ვერცერთ ქვეყანაში აბსოლუტური სუბსტანცია".

მერაბ გაბინაშვილი თბილისის საქალაქო სასამართლოს უვადო მოსამართლეა. ის ერთ-ერთია იმ მოსამართლეებიდან, რომლებიც პარლამენტში წარდგენილ სადავო სიაში იყო. სწორედ ეს სია გახდა მმართველ პარტიაში განხეთქილების და არასამთავრობოების კრიტიკის მიზეზი. სიაში მყოფი მოსამართლეები ე.წ. კლანის წევრებად მოიაზრებოდნენ.

2006-2012 წლებში გაბინაშვილი მოსამართლედ მუშაობდა გორისა და ზესტაფონის რაიონულ და ქუთაისის საქალაქო სასამართლოში. 2019 წლის 2 ივლისს მოსამართლე მერაბ გაბინაშვილმა განიხილა პარლამენტის დეპუტატის, ნიკა მელიას საქმე და საქალაქო სასამართლოს მიერ შეფარსებული აღკვეთი ღონისძიება, 30 ათასი ლარის ოდენობით გირაო და დამატებითი შეზღუდვები, ძალაში დატოვა.

მერაბ გაბინაშვილი 2013-2017 წლებში იყო იუსტიციის უმაღლესი საბჭოს წევრი. ამავე პერიოდში თბილისის საქალაქო სასამართლოს თავმჯდომარე მამუკა ახვლედიანი თანამდებობიდან გაათავისუფლეს და გამჟღავნდა მოსამართლეთა საგამოცდო ტესტები.

საქართველოს ღია საზოგადოების ფონდის ექსპერტები მიუთითებენ იმაზე, რომ მერაბ გაბინაშვილის იუსტიციის უმაღლესი საბჭოს წევრობის პერიოდში აქტიურად გამოიყენებოდა მოსამართლეთა უკონკურსოდ გადაყვანისა და დაწინაურების მექანიზმი. მოსამართლე გაბინაშვილის იუსტიციის უმაღლესი საბჭოს წევრობის პერიოდში საბჭომ მხარი დაუჭირა ლევან მურუსიძისა (3 წლის ვადით) და მიხეილ ჩინჩალაძის (უვადოდ) თბილისის სააპელაციო სასამართლოს მოსამართლეებად გამწესებას.

ამავე თემაზე: