ნიკა გვარამია პროკურატურის მიერ ახალი ბრალის წაყენებასთან დაკავშირებთ ამბობს, რომ პრობლემა მთავარი არხია. ამის შესახებ მან პროკურატურაში შესვლამდე განაცხადა.

მისი თქმით, ის, რაზეც პროკურატურა საუბრობს, ისტორიებია, რომელიც არ მომხდარა.

"ვარ მშვიდად იმიტომ, რომ მთავარი საქმე და, შესაძლოა, ჩემი ცხოვრების მთავარი საქმე გავაკეთე და დავასრულე. ამ მიკროფონის [მთავარი არხის] ირგვლივ რაც საჭიროა, ყველაფერი მზადაა, ყველაფერი გაკეთებულია და ჩემი სადმე ჩაჯენა და იზოლირება არავითარ შედეგს არ გამოიღებს", — თქვა გვარამიამ.

მისივე განცხადებით, ყველაფერს ელოდება, მათ შორის დაკავებასაც, რადგან, მისივე თქმით, ეს ხელისუფლება "საზღვრებიდან გადასულია".

რუსთავი 2-ის საქმეზე ნიკა გვარამიას ახალი ბრალი წაუყენეს, რაც რუსთავი 2-ის კუთვნილი ქონების დიდი ოდენობით გაფლანგვასა და გაყალბებას გულისხმობს.