ეროვნული უსაფრთხოების საბჭოს აპარატის უფროსი, კახაბერ ქემოკლიძე ამბობს, რომ ოსური მხარისგან ულტიმატუმის პათოსით საუბარი [საგუშაგოს დაშლაზე] გაუგებარი და "კატეგორიულად მიუღებელია". მისივე თქმით, ხაშურის მუნიციპალიტეტის სოფელ ჩორჩანასთან არსებული ტერიტორია 2008 წლის ომამდეც და მის შემდეგაც მიიჩნეოდა ცენტრალური ხელისუფლების მიერ კონტროლირებად ტერიტორიად:

"ის განცხადება, რაც გააკეტა დე-ფაქტო ხელისუფლების წარმომადგენელმა, იყო ემოციურ ფონზე გაკეთებული. მსგავსი განცხადებები ხშირად გვინახავს ერგნეთის ფორმატის განმავლობაში და სხვადასხვა ტექნიკურ შეხვედრებზე".

კახაბერ ქემოკლიძის განმარტებით, ოსური მხარე აცხადებს, რომ სოფელ ჩორჩანასთან არის ე.წ. სადავო ტერიტორია:

"ძალიან მნიშვნელოვანია ისიც, რომ აქ აქტიურად ოპერირებდეს ევროკავშირის სადამკვირვებლო მისია და შსს-ს მობილური პატრულირების ჯგუფები. საგუშაგოს მთავარი მოტივაცია ცენტრალური ხელისუფლების მხრიდან მარტივია, გაუმჯობესდეს უსაფრთხოების გარემო".

გუშინ, 29 აგვისტოს სოფელ ერგნეთში ინციდენტების პრევენციისა და მათზე რეაგირების მექანიზმის შეხვედრა ჩაიშალა. დე-ფაქტო რეჟიმის წარმომადგენელმა, ეგორ კოჩიევმა განაცხადა, რომ მათ ქართული მხარისგან სოფელ ჩორჩანას საგუშაგოს აღება და პროვოკაციების შეწყვეტა მოითხოვეს. შეხვედრა კი "ქართული მხარის მიერ კონსტრუქციულ დიალოგზე არწასვლის" გამო დატოვეს.