"ჩამოვედი", — ასე პასუხობს გორის მერი კონსტანტინე თავზარაშვილი საზოგადოების კრიტიკას მის შვებულებაში ყოფნაზე. თავზარაშვილი განმარტავს, რომ შვებულებაში მას შემდეგ, გავიდა რაც გუგუტიანთკარში უკანონო ბორდერიზაციის პროცესი დაიწყო. მისი თქმით, 7 აგვისტოს, როცა საოკუპაციო რეჟიმმა ძელების გავლება დაიწყო, ის სოფელში იმყოფებოდა და მოსახლეობასაც შეხვდა.

"4 დღე მქონდა აღებული [შვებულება]. მანამდე, 7-ში როდესაც დაიწყებს ჩარჭობა მილების, ვიყავი იქ. შევხვდი საკრებულოს წევრი იყო იქ, ჩვენი წარმომადგენელიც იყო. მათთან მქონდა ურთიერთობა. მეორე დღეს არაფერი ხდებოდა, მიწყნარდა ეს საქმე, შეჩერდა. შემდეგ წავედი და როდესაც გავიგე ეს სიტუაცია იყო დავბრუნდი", — ამბობს ის რუსთავი 2-თან საუბრისას.

ჟურნალისტის კითხვაზე რატომ დაბრუნდა 5 დღის შემდეგ, როცა მის დაქვემდებარებაში მყოფ რეგიონში ოკუპანტები მიწას იტაცებდნენ, მერი პასუხობს, რომ იმაზე მეტს ვერ გააკეთებდა, რასაც მისი წარმომადგენლები აკეთებდნენ. მისივე თქმით, მოადგილე საქმის კურსში აყენებდა.

"იგივეს აკეთებდნენ, რაც მე უნდა გამეკეთებინა. ამიტომ, როდესაც ასეთი ამბავი მოხდა მე დავბრუნდი. გაკეთებით ვინ, რას გააკეთებდა? თქვენ გააკეთებდით? ან ოპოზიციური პარტიები? ვერავინ ვერაფერს გააკეთებდა", — აცხადებს ის.სსს

გუგუტიანთკარში უკანონო ბორდერიზაციის პროცესი აგვისტოს ომის მე-11 წლისთავზე, 7 აგვისტოს დაიწყო და რამდენიმე დღეში შეწყდა. 15 აგვისტოს საოკუპაციო რეჟიმმა მუშაობა განახლა.

რუსი სამხედროებმა ე.წ. საზღვარი გაავლეს საქართველოს მოქალაქეების, რაზმაძეებისა და გუგუტიშვილების ნაკვეთებში. საოკუპაციო ხაზს მიღმა მოექცა მათი საცხოვრებელი სახლი, სათავსო, ყანები და სავარაუდოდ, წყლის რეზერვუარი. საოკუპაციო რეჟიმმა სამი დღე მისცა ადგილობრივებს, სახლების დასაცლელად. რაზმაძეების ოჯახმა სახლი მთლიანად დაშალა და საშენი მასალა გამოიტანა.

მოსახლეობა დახმარებას ითხოვდა, გორის მერი კი რამდენიმე დღე არ ჩანდა. როგორც მან განაცხადა, სოფელში შვებულების დასრულების შემდეგ ჩავიდოდა. მოსახლეობა მერის ამ პასუხს კრიტიკულად შეხვდა.