"ნორმალურია ახლა ეგა? ეგა სწორია, მაგას რომ იძახის? სად შვებულებაში, დასვენების დრო არი ამ უბედურეობაშია?", — ასე აფასებს გუგუტიანთკარის მცხოვრები სარდიონ გუგუტიშვილი გორის მერის განცხადებას იმის შესახებ, რომ სოფელში შვებულების დასრულების შემდეგ ჩავა. ამის შესახებ მან რუსთავი 2-ს განუცხადა.

მოსახლეობა საზოგადოებასა და ხელისუფლებას მხარდაჭერისა და სოფელში ჩასვლისკენ მოუწოდებს, გორის მერი კი ამ დრომდე გუგუტიანთკარში არ ყოფილა. კითხვაზე, როდის აპირებს ოკუპირებულ სოფელში ჩასვლას მან უპასუხა: "კვირას, შვებულების დასრულების შემდეგ".

გუგუტიანთკარში უკანონო ბორდერიზაციის პროცესი აგვისტოს ომის მე-11 წლისთავზე, 7 აგვისტოს დაიწყო და რამდენიმე დღეში შეწყდა.15 აგვისტოს საოკუპაციო რეჟიმმა მუშაობა განახლა.

რუსი სამხედროები ძელებს არჭობენ საქართველოს მოქალაქეების, რაზმაძეებისა და გუგუტიშვილების ნაკვეთებში. ე.წ. საზღვარს მიღმა ექცევა მათი საცხოვრებელი სახლი, ყანები და წყლის რეზერვუარი. საოკუპაციო რეჟიმმა სამი დღე მისცა ადგილობრივებს, სახლების დასაცლელად. რაზმაძეების ოჯახი სახლს მთლიანად შლის და საშენი მასალა გამოაქვ.

მომხდარს უკვე გამოეხმაურა საერთაშორისო თანამეგობრობა და რუსეთს უკანონო ქმედებების შეწყვეტისკენ მოუწოდა. გუგუტიანთკარში იმყოფებდონენ საქართველოში აკრედიტებული დიპლომატიური კორპუსის წარმომადგენლებიც და ადგილზე გაეცნენ ვითარებას.