იაპონიის ელჩი, ტადაჰარუ უეჰარა დიპლომატიური კორპუსის წარმომადგენლებთან ერთად გუგუტიანთკარში იყო, სადაც რუსმა სამხედროებმა ბორდერიზაციის პროცესი განაახლეს. ჟურნალისტებთან საუბრისას მან აღნიშნა, რომ შეშფოთებულია ადგილზე ნანახი ვითარებით:

"იაპონია ეწინააღმდეგება საქართველოს საერთაშორისოდ აღიარებული საზღვრების შეცვლას. ოჯახების გაყოფა სერიოზული პრობლემაა, ასე რომ ნამდვილად მესმის და დიდი თანაგრძნობა მაქვს დაზარალებული ოჯახების მიმართ. იმედი მაქვს, სიტუაცია რაც შეიძლება მალე გამოსწორდება".

საოკუპაციო ხაზთან, იქ სადაც რუსმა სამხედროებმა მოსახლეობის სახლები და საკარმიდამო ნაკვეთები შემოღობეს, ელჩები დღეს, 16 აგვისტოს 12 საათისთის ჩავიდნენ.

15 აგვისტოს გორის მუნიციპალიტეტის სოფელ გუგუტიანთკარში საოკუპაციო რეჟიმმა ე.წ. საზღვრის გავლების უკანონო პროცესი განაახლა. საქართველოს მოქალაქეების, რაზმაძეებისა და გუგუტიშვილების ნაკვეთებში რუსი სამხედროები ძელებს არჭობდნენ. ეს ოჯახები სწორედ ამ მიწის ნაკვეთებს ამუშავებდნენ და მოსავალი მოჰყავდათ. შესაძლოა, ოკუპირებულ ტერიტორიაზე მოხვდეს სოფლის მთავარი სარწყავი არხიც. შედეგად, ადგილობრივები წყლის გარეშე დარჩებიან. გორის საკრებულოს წარმომადგენელმა თქვა, რომ ამ საკითხზე რუს სამხედროებს ესაუბრა, რომლებმაც უთხრეს, რომ წყლის რეზერვუარს საქართველოს არაკონტროლირებად ტერიტორიაზე არ მოაქცევდნენ.

სახელმწიფო უსაფრთხოების სამსახურში On.ge-ს უთხრეს, რომ ორჯერ გაააქტიურეს ცხელი ხაზი, ინფორმირებულია ევროკავშირის სადამკვირვებლო მისია. ამავე სოფელში მავთულხლართების გაბმა დაიწყეს 7 აგვისტოსაც, მოგვიანებით კი სამუშაოები შეწყდა, ოთხი დღის შემდეგ კი ისევ განახლდა.

ამავე თემაზე: