"აქ ცხოვრება გმირობის ტოლფასია", — ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა გუგუტიანთკარში განაცხადა.

მისი თქმით, უკანონო ბარიკადები და მავთულხლართები, ეს არ არის ახალი მოვლენა. ეს უკანონო ე.წ. ბორდერიზაცია, არის მანიფესტი იმისა, რომ ძალიან ცოცხალი, მიმდინარე ოკუპაციის პირობებში ვცხოვრობთ.

"პროცესი 2008 წლის ზუსტად ამ თვიდან, აგვისტოდან დაიწყო ფაქტობრივად, უშუალოდ ასეთი შეღობვები 2009-2011 წლებში იყო, 2013 წელსაც იყო ასეთი მსხვილი ეპიზოდები. ჩვენი ქვეყნის შუაგულში 100-ზე მეტი სოფელი სხვადასხვა ფორმით არის გახლეჩილი. აშკარაა, მე დღეს რაც აქ ვნახე, უკვე გავლებულია მავთულხლართები, მეორე რიგის ბარიკადების მშენებლობა სხვას არაფერს ემსახურება თუ არა დამატებითი დაძაბულობის შექმნას, ადამიანების წინააღმდეგ მიმართული ზომაა", — განაცხადა ქეთევან ციხელაშვილმა.

ის ამბობს, რომ გამყოფ ხაზთან მცხოვრები მოსახლეობის მხარდაჭერა მომავალში კიდევ უფრო გაძლიერდება: "სახელმწიფო მხოლოდ გააძლიერებს ადამიანების დახმარებას, ეს არის ჩვენი პასუხი მავთულხლართების პოლიტიკაზე, იმიტომ, რომ მე ვარ დარწმუნებული, ასეთი შეუპოვრობით, მშვიდობით, ძალიან პრინციპული პოლიტიკით, მაგრამ პირველ რიგში, ამ ადამიანების გვერდში დგომით და ამ ადამიანების ასეთი შეუპოვარი დამოკიდებულებით, ჩვენ შევძლებთ, რომ ეს მახინჯი მავთულხლართები დავშალოთ".

რადიო თავისუფლების კითხვაზე მოექცევა თუ არა ორი სახლი საოკუპაციო ხაზის მიღმა ქეთევან ციხელაშვილს დაზუსტებული პასუხი არ აქვს: "ვადგენთ, იმიტომ, რომ აშკარაა, რომ რაღაც მონაკვეთებში არის ბოძები ჩაყრილი და მახინჯი, უხეში კონსტრუქციები გაკეთებული".

სახალხო დამცველმა ნინო ლომჯარიამ გუგუტიანთკარში ვიზიტისას თქვა, რომ ორი სახლი საქართველოს არაკონტროლირებად ტერიტორიაზე ხვდება და ამ სახლის პატრონებს 3-დღიანი ვადა მიეცათ საკუთარი ნივთების გასატანად.

15 აგვისტოს გორის მუნიციპალიტეტის სოფელ გუგუტიანთკარში საოკუპაციო რეჟიმმა ე.წ. საზღვრის გავლების უკანონო პროცესი განაახლა. საქართველოს მოქალაქეების, რაზმაძეებისა და გუგუტიშვილების ნაკვეთებში რუსი სამხედროები ძელებს არჭობდნენ. ეს ოჯახები სწორედ ამ მიწის ნაკვეთებს ამუშავებდნენ და მოსავალი მოჰყავდათ. დადასტურებული ინფორმაციით, ორი ოჯახის, რაზმაძეებისა და გუგუტიშვილების სახლები საოკუპაციო ხაზს მიღმა მოხვდება. მათ ტერიტორიის დასაცლელად სამდღიანი ვადა მიეცათ. სამი დღის შემდეგ ისინი საკუთარ სახლებში ვეღარ შევლენ. შესაძლოა, ოკუპირებულ ტერიტორიაზე მოხვდეს სოფლის მთავარი სარწყავი არხიც. შედეგად, ადგილობრივები წყლის გარეშე დარჩებიან. გორის საკრებულოს წარმომადგენელმა თქვა, რომ ამ საკითხზე რუს სამხედროებს ესაუბრა, რომლებმაც უთხრეს, რომ წყლის რეზერვუარს საქართველოს არაკონტროლირებად ტერიტორიაზე არ მოაქცევდნენ.

სახელმწიფო უსაფრთხოების სამსახურში On.ge-ს უთხრეს, რომ ორჯერ გაააქტიურეს ცხელი ხაზი, ინფორმირებულია ევროკავშირის სადამკვირვებლო მისია. ამავე სოფელში მავთულხლართების გაბმა დაიწყეს 7 აგვისტოსაც, მოგვიანებით კი სამუშაოები შეწყდა, ოთხი დღის შემდეგ კი ისევ განახლდა.

ამავე თემაზე: