Google-ის, Apple-ის, Microsoft-ისა და Amazon-ის შემდეგ, როგორც იქნა, Facebook-მაც აღიარა, რომ მათ მიერ დაქირავებული თანამშრომლები Messenger-ში გაგზავილ ხმოვან შეტყობინებებს უსმენდნენ და შიფრავდნენ.

კომპანია აცხადებს, რომ ჩანაწერების მოსმენა ერთი კვირის წინ შეწყდა.აღნიშნული ინფორმაცია პირველად Bloomberg-მა გაავრცელა, რომლის მიხედვითაც დაქირავებულ თანამშრომლებს ხმოვანი ჩანაწერები მიეწოდებოდათ, თუმცა მათთვის ჩანაწერების წყარო უცნობი იყო.

ფეისბუქი აცხადებს, რომ ადამიანების მიერ ჩანაწერების გაშიფვრის მიზანი ხელოვნური ინტელექტის ალგორითმების დახვეწა იყო.

ფეისბუქი თქმით, კომპანია მხოლოდ იმ მომხმარებლების ჩანაწერებს უსმენდა, რომლებსაც მესენჯერისთვის მიკროფონსი გამოყენების უფლება ჰქონდათ მიცემული.

"გუგლისა და ეფლის მსგავსად, ადამიანების მიერ ჩანაწერების განხილვის პრაქტიკა ერთი კვირის წინ შევაჩერეთ", — აცხადებს ფეისბუქის წარმომადგენელი.

"ჩვენ ახლა ფეისბუქისგან დამატებით განმარტებას ველოდებით, თუ როგორ მოდის თანხვედრაში მსგავსი გადაწყვეტილება არსებულ რეგულაციებთან", — აცხადებს ირლანდიის მონაცემთა დაცვის კომისარი, რომელიც ევროკავშირში, ინფორმაციის დაცვის კუთხით, ფეისბუქის მთავარი ზედამხედველია.

ცოტა ხნის წინ მაიკროსოფტმაც განაცხადა, რომ Skype-ს ავტომატური თარგმნის სერვისის გასაუმჯობესებლად მომხმარებელთა ჩანაწერებს კომპანიის მიერ დაქირავებული ადამიანები უსმენდნენ.

მსგავს მეთოდს იყენებს თუ არა Alexa-ს შემთხვევაში Amazon, ჯერჯერობით უცნობია.