"თუ სახალხო, ძლიერი პროტესტი იქნება, ამას რეჟიმი ანგარიშს გაუწევს, ხოლო ამ სახალხო პროტესტისთვის საჭიროა მათ შორის, პოლიტიკური სპექტრის დიდი, ეროვნული ერთობა" — ამის შესახებ კოალიცია ცვლილებისთვის წევრმა, გედევან ფოფხაძემ ჟურნალისტებს პარლამენტთან განუცხადა, სადაც ის ელენე ხოშტარიასთან ერთად შიმშილობს.

მისი თქმით, "თუ ერთიანი ფრონტი არ გაჩნდება, რომელიც რეჟიმს დაამთავრებს, არანაირი მორალური უფლება არ აქვს, შიმშილობა შეწყვიტოს"

"თუ გაჩნდება ფორმატი, რომელიც უფრო ქმედითი და ბრძოლისუნარიანი იქნება, შიმშილობა, რომ არ არის ის საშუალება, რომელიც რეჟიმს გადაწყვეტილებას მიაღებინებს, ეს ჩვენ ძალიან კარგად გვესმის. ვხვდები, რომ ემპათია არ არის ხელისუფლების საუკეთესო თვისება. მაგრამ თუ სახალხო, ძლიერი პროტესტია — ამას რეჟიმი ანგარიშს გაუწევს. ამ სახალხო პროტესტისთვის საჭიროა დიდი, ეროვნული ერთობა, მათ შორის, პოლიტიკური სპექტრის. უნდა შევთანხმდეთ იმაზე, რომ ერთობის საფუძველი და გამაერთიანებელი პრინციპი უკომპრომისო, უშეღავათო და პრინციპული ბრძოლაა, სადაც არ რჩება სივრცე ამ რეჟიმის აღიარების და თანამშრომლობის.

ულტიმატუმის ენით არავინ საუბრობს. მე საერთოდ არ მაინტერესებს გახარია და ლელო რას გააკეთებენ. მე ჩემს სინდისთან უნდა ვიყო მართალი - თუ ვიღაცას ჰგონია, რომ თვითმმართველობაში კენჭისყრით და იმით, რომ თბილისის საკრებულოში შევა ოპოზიციიდან, ის თავისი სამშობლოს წინაშე ვალს ასე მოიხდის — მე მგონია, რომ ჩვენი ვალი თავგანწირვით უნდა მოვიხადოთ. თუ საქართველოში ერთიანი ფრონტი არ გაჩნდება, რომელიც რეჟიმს დაამთავრებს, არანაირი მორალური უფლება არ მაქვს, შევწყვიტო შიმშილობა" — განაცხადა გედევან ფოფხაძემ. კომენტარს IPN ავრცელებს.

შეგახსენებთ, უკვე მეოთხე დღეა პარლამენტთან კოალიცია ცვლილებისთვის ლიდერი ელენე ხოშტარია შიმშილობს, მას მეორე დღეს შეუერთდა ამავე კოალიციის წევრი გედევან ფოფხაძე და 4 სამოქალაქო აქტივისტი. პროტესტის ამ ფორმას საზღვარგარეთიდან უერთდება ბათუმელი მედროშე თემურ ქათამაძეც. პარლამენტთან ამ დროისთვის 6 ადამიანი შიმშილობს.

ასევე იხილეთ: